27 اقپاندا ساعات 06-21-دە تاراز قالاسىندا 9 ىقشام اۋدانىنداعى 62-ءشى ءۇيدىڭ 1-3 قاباتتارى قۇلاعان (الدىن-الا مالىمەتتەر بويىنشا, جارىلىس 2-ءشى قاباتتاعى 46-شى پاتەردە بولعان).
قر ءىىم تجك كۇشىمەن قاجەتتى ماماندار مەن تەحنيكا سانى جۇمىلدىرىلدى, ءۇيدىڭ بارلىق تۇرعىندارى تولىق كوشىرىلدى. ۇيىندىلەر استىنان 8 ادام شىعارىلدى, ونىڭ 2-ۋى قازا تاپقان. زارداپ شەككەندەردىڭ ءحالى — ورتاشا اۋىر.
تاراز قالاسىنداعى توتەنشە جاعداي تۋرالى قر پرەمەر-ءمينيسترى ا.ۇ. مامين شۇعىل تۇردە قازاقستان پرەزيدەنتى ن.ءا. نازارباەۆقا باياندادى.
مەملەكەت باسشىسىنىڭ تاپسىرماسى بويىنشا قر پرەمەر-ءمينيسترىنىڭ ورىنباسارى ج. قاسىمبەكتىڭ توراعالىعىمەن ۇكىمەت كوميسسياسى قۇرىلدى. كوميسسيا مۇشەلەرى تاراز قالاسىنا وقيعا ورنىنا ۇشىپ كەتتى.
اپات بولعان ءۇيدىڭ تۇرعىندارى وسى ۇيگە جاقىن ماڭداعى №47 مەكتەپكە ورنالاستىرىلدى, ىستىق تاماقپەن قامتىلدى, ۋاقىتشا تۇرۋعا قاجەتتى جاعدايلار جاسالدى. ولارمەن مەديتسينا قىزمەتكەرلەرى مەن پسيحولوگتار جۇمىس ىستەۋدە.
قر ءىىم تجك الدىن-الا مالىمەتى بويىنشا, جارىلىس گاز جابدىعىن ابايسىز پايدالانۋدان ورىن العان.
جەدەل شتاب قۇرىلدى, +7- 7262 - 513575 ءنومىرى بويىنشا جەدەل جەلى جۇمىس ىستەيدى.