قازاقستان مەن وزبەكستان ديپلوماتتارى ءىرى ءىس-شارالار قارساڭىندا «ساعات تەڭەستىردى»

قازاقستان دەلەگاتسياسىن سىرتقى ىستەر ءمينيسترىنىڭ ورىنباسارى عالىمجان قويشىباەۆ, ال وزبەك تاراپىن - سىرتقى ىستەر ءمينيسترىنىڭ ءبىرىنشى ورىنباسارى يلحوم نەماتوۆ باسقاردى. تاراپتار ساياسي, ساۋدا-ەكونوميكالىق جانە مادەني-گۋمانيتارلىق سالالارداعى كەڭ اۋقىمدى ماسەلەلەردى, سونداي-اق حالىقارالىق جانە وڭىرلىك قۇرىلىمدار شەڭبەرىندەگى استانا مەن تاشكەنتتىڭ ءوزارا ءىس-قيمىلىن قاراستىردى.

كونسۋلتاتسيالار شەڭبەرىندە سىرتقى ىستەر ءمينيسترى بەيبىت اتامقۇلوۆ وزبەكستان سىرتقى ىستەر ءمينيسترىنىڭ ءبىرىنشى ورىنباسارى يلحوم نەماتوۆتى قابىلدادى.

ء«بىز ءۇشىن وزبەكستان باۋىرلاس ەل, وڭىردەگى نەگىزگى ساياسي جانە ەكونوميكالىق ارىپتەس بولىپ تابىلادى», – دەپ اتاپ ءوتتى قازاقستان ءسىم باسشىسى. سىرتقى ساياسي ۆەدومستۆولار ءۇشىن باسىم مىندەت مەملەكەت باسشىلارى نۇرسۇلتان نازارباەۆ پەن شاۆكات ميرزيەەۆتىڭ ىنتىماقتاستىقتى جان-جاقتى نىعايتۋ جونىندەگى ۋاعدالاستىقتارىن تولىق جانە ءتيىمدى ىسكە اسىرۋ بولىپ تابىلادى. 2018 جىلى ەكىجاقتى تاۋار اينالىمى 25,3%-عا ءوسىپ, 2,5 ملرد. اقش دوللارىن قۇرادى.

مينيستر الداعى ءىس-شارالاردىڭ جوعارى دەڭگەيدە ساپالى دايىندىعىنا, اسىرەسە, ورتالىق ازيا مەملەكەتتەرى باسشىلارىنىڭ تاشكەنتتە وتەتىن ەكىنشى جۇمىس (كونسۋلتاتيۆتىك) كەزدەسۋىنىڭ, سونداي-اق وزبەكستاندا قازاقستان جىلىنىڭ سالتاناتتى اشىلۋىنىڭ ماڭىزدىلىعىنا نازار اۋداردى.