بەيبىت اتامقۇلوۆ اراب ەلدەرىنىڭ ەلشىلەرىمەن ىنتىماقتاستىق جوسپارىن تالقىلادى

پرەزيدەنت نۇرسۇلتان نازارباەۆ اراب الەمىمەن جان-جاقتى جانە ءوزارا ءتيىمدى ىنتىماقتاستىقتى نىعايتۋعا ايرىقشا ماڭىز بەرەدى, دەپ اتاپ ءوتتى مينيستر. ەلشىلەر شەتەلدىك ينۆەستيتسيالاردى تارتۋ جانە شەتەلگە قازاقستاندىق ەكسپورتتى جىلجىتۋ سالاسىندا سىرتقى ىستەر مينيسترلىگىنىڭ جاڭا وكىلەتتىكتەرىمەن تانىستى. ب.اتامقۇلوۆ ساۋدا-ەكونوميكالىق قاتىناستاردى دامىتۋعا, سونداي-اق ەنەرگەتيكا, لوگيستيكا, اۋىل شارۋاشىلىعى جانە باسقا دا سالالاردا بىرلەسكەن ينۆەستيتسيالىق جوبالاردى جۇزەگە اسىرۋعا قازاقستاننىڭ مۇددەلىلىگىن اتاپ ءوتتى.

وسى ۋاقىتقا دەيىن اراب ەلدەرىنىڭ كوپشىلىگىمەن ساۋدا-ەكونوميكالىق جانە ينۆەستيتسيالىق سالالاردا ءوزارا ءىس-قيمىلدىڭ زور الەۋەتى ءالى كۇنگە دەيىن تولىعىمەن پايدالانىلماعانى اتاپ ءوتىلدى.

مينيستر 2018 جىلى قازاقستاننىڭ بارلىق 22 اراب ەلىمەن جيىنتىق تاۋار اينالىمىنىڭ كولەمى 1 ملرد اقش دوللاردان اسپاعانىنا, ال ينۆەستيتسيالاردىڭ جالپى كولەمى بۇگىندە نە ءبارى 2,4 ملرد اقش دوللار بولعانىنا نازار اۋداردى. سونىمەن بىرگە قازىرگى ۋاقىتتا سوماسى 9 ملرد اقش دوللارى بولاتىن بىرلەسكەن جوبالار پىستىقتالۋدا ەكەنى اتاپ ءوتىلدى.

ساۋدا-ەكونوميكالىق ىنتىماقتاستىقتى جانداندىرۋ ماقساتىندا كولىك جانە لوگيستيكا سالاسىنداعى پروبلەمالاردى شەشۋگە, ۆيزالىق رەجيمدى جەڭىلدەتۋ ارقىلى تۋريستىك الەۋەتتى دامىتۋ قاجەتتىگىنە ەرەكشە نازار اۋدارىلدى.

وسىعان بايلانىستى, قازاقستاندىق ءسىم باسشىسى اراب ارىپتەستەرىن ەكىجاقتى ىنتىماقتاستىقتىڭ بارلىق باعىتتارى بويىنشا بەلسەندى ءىس-قيمىلعا شاقىردى.

سونىمەن قاتار ب.اتامقۇلوۆ ۇستىمىزدەگى جىلدىڭ 1-2 ناۋرىزىندا ابۋ-دابي قالاسىندا وتەتىن يسلام ىنتىماقتاستىعى ۇيىمى (يىۇ) سىرتقى ىستەر مينيسترلەرى كەڭەسىنىڭ 46-شى وتىرىسىنىڭ جۇمىسىنا قاتىسۋىن راستادى. ول كۇن تارتىبىندە ءبىزدىڭ ەلدەرىمىزگە قاتىستى ماسەلەلەردىڭ كەڭ اۋقىمىن ەنگىزىلگەنىن اتاپ ءوتتى. ءسىم باسشىسى وسى ءىس-شارا اياسىندا يىۇ-عا مۇشە ەلدەر سىرتقى ىستەر ۆەدومستۆولارىنىڭ باسشىلارىمەن, سونىڭ ىشىندە اراب مينيسترلەرىمەن كەزدەسەتىنىن ايتتى.