ول نەگىزىن سالعان انشىلىك مەكتەپ ەرەكشە ورىنداۋشىلىق شەبەرلىكتى قاجەت ەتەدى. «كوكىرەگىنەن اسەم ءاننىڭ كوك مۇحيتىن شايقاعان, ەي, عارەكە! قاسيەتتى قازىنا جىر, بايتاق ءان», دەپ تولەگەن ايبەرگەنوۆ جىرعا قوسقان قازاق مۋزىكا مادەنيەتىنىڭ قۇبىلىسى عاريفوللا قۇرمانعاليەۆتىڭ تۋعانىنا بيىل 110 جىل. مۇحيت مۇراسىن ناسيحاتتاۋشى, عاجايىپ ءانشى-كومپوزيتوردىڭ قۇرمەتىنە ارنالىپ اتىراۋدا رەسپۋبليكالىق بايقاۋ ءوتتى.
«اقجايىقتان ءان وزدىرعان» دەپ اتالعان انشىلەر بايقاۋىنا ەلىمىزدىڭ تۇكپىر-تۇكپىرىنەن ءداستۇرلى ونەردى دارىپتەۋشىلەر قاتىستى. اتىراۋ وبلىستىق اكىمدىگىنىڭ قولداۋىمەن وبلىستىق مادەنيەت, ارحيۆتەر جانە قۇجاتتاما باسقارماسى, دينا نۇرپەيىسوۆا اتىنداعى اكادەميالىق قازاق حالىق اسپاپتار وركەسترى ۇيىمداستىرعان شارا ەكى كۇنگە سوزىلدى.
– ەلباسى « ۇلى دالانىڭ جەتى قىرى» اتتى ماقالاسىندا « ۇلى دالانىڭ ۇلى ەسىمدەرى», «دالا فولكلورى مەن مۋزىكاسىنىڭ مىڭ جىلى» جوبالارىن ايرىقشا اتاپ ءوتتى. «بولاشاققا باعدار: رۋحاني جاڭعىرۋ» باعدارلاماسى دا ۇلتتىق ونەردى ۇلىقتاۋ باعىتىنداعى يگى ىستەرگە ارقاۋ بولىپ وتىر. بۇل شارا مەملەكەت باسشىسىنىڭ وسى باعدارلامالارىن جۇزەگە اسىرۋدى ماقسات ەتەدى, – دەدى بايقاۋدىڭ اشىلۋ سالتاناتىندا وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى سالامات سابىر.
قازاقستاننىڭ ەڭبەك سىڭىرگەن قايراتكەرى, باتىس قازاقستان وبلىستىق ع.قۇرمانعاليەۆ اتىنداعى فيلارمونيانىڭ ءانشىسى قاتيموللا بەردىعاليەۆ باستاعان قازىلار القاسى ءدۇبىرلى ونەر دوداسىنا قاتىسۋشىلارعا باعا بەردى. بايقاۋ ناتيجەسىندە جۇلدەلى ءبىرىنشى ورىندى ماڭعىستاۋلىق نۇرىم اسقاروۆ پەن باتىسقازاقستاندىق دانيار ەلەۋسىنوۆ جەڭىپ الدى.
باقىتگۇل باباش,
«Egemen Qazaqstan»
اتىراۋ