ءبىلىم جانە عىلىم مينيسترلىگى, استانا قالاسىنىڭ ءبىلىم باسقارماسى «Ernst & Yong» كومپانياسىمەن بىرىگىپ پوليتەحنيكالىق كوللەدج بازاسىندا تەحنيكالىق جانە كاسىپتىك وقۋ ورىندارىنىڭ ستۋدەنتتەرى اراسىندا «حاكاتون» يدەيالار بايقاۋىن وتكىزدى. شارانىڭ نەگىزگى ماقساتى – قازاقستان كوللەدجدەرىنىڭ ۇزدىك ستۋدەنتتەرىن كوممەرتسيالىق جانە وندىرىستىك سالالارداعى وزەكتى ماسەلەلەردى شەشۋگە تارتۋ.
بايقاۋعا قاتىسۋعا ەكونوميكانىڭ قۇرىلىس ونەركاسىبى, ەلەكتر ەنەرگەتيكا سالاسى, مۇناي ونەركاسىبى, تاۋ-كەن ونەركاسىبى, اقپاراتتىق تەحنولوگيالار سالاسى (IT) بويىنشا قازاقستاندىق ىسكەرلىك بىرلەستىكتەردىڭ وكىلدەرى جانە جۇمىس بەرۋشىلەر شاقىرىلدى.
اتالعان شارا جۇمىس بەرۋشىلەرگە ءوز سالاسى بويىنشا ۇزدىك كوللەدج ستۋدەنتتەرىن تاڭداپ الۋعا, كاسىبىنە قاجەتتى جاڭا يدەيالار مەن وزەكتى ماسەلەلەرگە دايىن شەشىم قابىلداۋعا, برەندتى تانىمال ەتۋ جانە كومپانيانىڭ نارىقتاعى تانىمالدىلىعىن ارتتىرۋعا وراسان زور مۇمكىندىك بەرەدى.
«ەلوردادا تۇڭعىش رەت «حاكاتون» يدەيالار بايقاۋى باستالدى. بۇل شاراعا ەلىمىزدەگى تەحنيكالىق جانە كاسىپتىك ءبىلىم بەرۋ مەكەمەلەرىنىڭ ستۋدەنتتەرى قاتىسۋدا. ەڭ ۇزدىك بيزنەس يدەيالار جۇمىس بەرۋشىلەر تاراپىنان ۇسىنىلعان گرانتقا يە بولادى. سونداي-اق تاۋ-كەن ونەركاسىبى, قۇرىلىس, IT مەن مۇناي-گاز سالاسىندا ءوز تاجىريبەلەرىن شىڭداۋعا مۇمكىندىك الماق. ولارعا قويىلاتىن نەگىزگى تالاپ – ءوندىرىس ورنىن دامىتۋ جانە تۇيتكىلدى ماسەلەلەردى تەز ارادا شەشۋ. اتالعان جارىسقا ەلىمىزدىڭ 11 ايماعىنان 150-گە تارتا ستۋدەنت قاتىستى», دەيدى استانا قالاسى ءبىلىم باسقارماسى تەحنيكالىق جانە كاسىپتىك ءبىلىم بەرۋ ءبولىمىنىڭ باسشىسى سالتانات باسىقاراەۆا.
«ەگەمەن-اقپارات»