بۇگىن استانالىق «بارىس» حوككەي كلۋبى مەن تومەنگى نوۆگورودتىڭ «تورپەدوسى» باق سىنايدى. ەكى كوماندا گاگارين كۋبوگىنىڭ 1/8 فينالىندا كىم مىقتىنى انىقتاماق.
«بارىس» ءۇشىن قۇرلىقتىق حوككەي ليگاسىنىڭ بيىلعى بىرىنشىلىگى ءساتتى اياقتالدى. چەرنىشيوۆ ديۆيزيونىندا توپ جارعان ەلوردالىقتار جارتىلاي فينالعا دەيىن العاشقى ماتچتاردى ءوز ايدىنىندا وتكىزۋگە مۇمكىندىگى بار.
ونىڭ ۇستىنە, «بارىس» ورتا ەسەپپەن ءار ويىندا 3 شايبا سوققان ۇزدىك بەس كلۋبتىڭ قاتارىنا ەنىپ وتىر. قازىرگى تاڭدا استانالىقتار 190 گول سالعان. بۇل – بىرىنشىلىك قحل جەڭىمپازى تسسكا-دان ءبىر شايباعا عانا كەم.
ەندەشە, ەلوردالىقتاردىڭ شابۋىلى ناعىز بابىندا دەۋگە تولىق نەگىز بار. ءتىپتى, بىلتىرعى سۇرمەرگەن نايدجەل دوۋستىڭ كوماندادان كەتكەنى دە «بارىستىڭ» شەبەرلىگىنە نۇقسان كەلتىرە قويعان جوق.
ماسەلەن, كوماندا سۇرمەرگەنى داررەن ءديتستىڭ ءبىر ءوزى 53 ۇپاي جينادى (15 شايبا+38 اسسيست). ول ۇزدىكتەر تىزىمىندە 9-ورىنعا تۇراقتادى. وعان قوسا, ديتس «بارىس» ويىنىنا جاڭا لەپ اكەلگەن بىرەگەي حوككەيشى ەكەنىن ايتا كەتكەن ءجون.
«تورپەدو» بيىلعى بىرىنشىلىكتىڭ باسىندا ەشكىمگە دەس بەرمەگەن بولاتىن. الايدا ۋاقىت وتە ولاردىڭ ويىنى قوجىراي باستادى. ايتەۋىر, چەمپيونات سوڭىندا سوڭعى كۇشىن جيناعان كوماندا پلەي-وففقا بەرىلەتىن جولدامانى جەڭىپ الدى.
بۇگىنگە دەيىن ەكى كلۋب ءوزارا 24 كەزدەسۋ وتكىزدى. سونىڭ 13-ىندە «بارىس» باسىمدىق تانىتقان بولاتىن. قالعانىندا «تورپەدونىڭ» اسىعى الشىسىنان ءتۇستى. ايتا كەتۋ كەرەك, ەلوردالىقتار 11 مارتە نەگىزگى ۋاقىتتا جەڭىسكە جەتكەن ەدى.
«بارىس» قارسىلاس قاقپاسىنا 71 شايبا سوقسا, «تورپەدو» ويىنشىلارى 68 مارتە مەرگەندىك تانىتقان. ەكى كوماندا سوڭعى رەت بىلتىر 14 قىركۇيەكتە كەزدەسىپ, «بارىس ارەنادا» وتكەن ماتچتا ەلوردالىقتار 4-1 ەسەبىمەن جەڭىسكە جەتتى.
ماتچ استانا ۋاقىتى بويىنشا 19:30-دا «بارىس ارەنادا» وتەدى
كەزدەسۋدى Qazsport جانە كحل-تۆ HD ارنالارى تىكەلەي ەفيردە كورسەتەدى.
جانكۇيەرلەر ءۇشىن «بارىس ارەنادان» قاتىنايتىن اۆتوبۋستار قاراستىرىلعان.