بانك ۆتب (قازاقستان) ماسكەۋ بيرجاسىنىڭ ۆاليۋتا نارىعىنداعى ساۋدا-ساتتىققا تىكەلەي قول جەتكىزدى

«ەۋرازيالىق ەكونوميكالىق وداق (بەج) اياسىنداعى قارجىلىق ءوزارا ءىس-قيمىل ايماقتىڭ ەكونوميكالىق تۇراقتىلىعىن ساقتاۋ ءۇشىن ۇلكەن ماڭىزعا يە. بەج-گە قاتىسۋشى ەلدەردىڭ ۆاليۋتالىق نارىقتارىنا قولجەتىمدىلىكتى ۇلعايتۋ – بۇل ەۋرازيالىق كەڭىستىكتە بيزنەس-بايلانىستاردى نىعايتىپ, ءوزارا ءتيىمدى ىنتىماقتاستىقتى دامىتۋدىڭ تاعى ءبىر ءساتتى قادامى. ۆتب (قازاقستان) بانكىنىڭ الدىندا ماسكەۋ بيرجاسىنىڭ ۆاليۋتا نارىعىنا تىكەلەي شىعۋ ءۇشىن اشىلاتىن جاڭا مۇمكىندىكتەر ءبىزدىڭ كليەنتتەرىمىزگە ارنالعان ءونىم جەلىسى مەن سەرۆيستى جاقسارتۋعا مۇمكىندىك بەرەدى», – دەپ اتاپ ءوتتى بانك ۆتب (قازاقستان) باسقارماسىنىڭ توراعاسى دميتري زابەللو.

بۇگىنگى تاڭدا ماسكەۋ بيرجاسىنىڭ ۆاليۋتالىق نارىعىنا ەۋرازيالىق ەكونوميكالىق وداقتىڭ بەس ەلىنەن (ەەو/ەۋرازەق) 14 بانك تىكەلەي قاتىناۋ رۇقساتىنا يە, ونىڭ ىشىندە ەكى حالىقارالىق قارجى ينستيتۋتى: مەملەكەتارالىق بانك جانە ەۋرازيالىق دامۋ بانكى (ەادب). ولاردىڭ جيىنتىق ساۋدا اينالىمى 2018 جىلى 2017 جىلمەن سالىستىرعاندا ءۇش ەسەگە ءوسىپ, 1,9 ترلن رۋبلگە جەتتى.

قازىرگى ۋاقىتتا ماسكەۋ بيرجاسىنىڭ ۆاليۋتا نارىعىندا سونىمەن قاتار «اقش دوللارى – رەسەي ءرۋبلى», «ەۋرو – رەسەي ءرۋبلى», «قىتاي ءيۋانى – رەسەي ءرۋبلى», «ەۋرو – اقش دوللارى», «گونكونگ دوللارى – رەسەي ءرۋبلى», «جاپون يەنى – رەسەي ءرۋبلى», «فۋنت ستەرلينگ – رەسەي ءرۋبلى», «فۋنت ستەرلينگ – اقش دوللارى», «شۆەيتساريا فرانكى – رەسەي ءرۋبلى», «شۆەيتساريا فرانكى – اقش دوللارى», «تۇرىك ليراسى – رەسەي ءرۋبلى», «تۇرىك ليراسى- اقش دوللارى», «بەلارۋس ءرۋبلى – رەسەي ءرۋبلى», «قازاقستان تەڭگەسى – رەسەي ءرۋبلى» جۇپتارى بويىنشا ساۋدا-ساتتىق وتۋدە. 2018 جىلدىڭ قورىتىندىسى بويىنشا ۆاليۋتا نارىعىنداعى ورتاشا كۇندىك ساۋدا كولەمى 22 ملرد. اقش دوللارىن قۇرادى.

ايناش ەسالي,

«Egemen Qazaqstan»

الماتى