بۇل كۇندەرى رەسپۋبليكالىق «3.2.1. ستارت!» ەكو-جوبالار بايقاۋى جارتىلاي مارەگە جاقىندادى.
اتالمىش بايقاۋعا ەلىمىزدەگى قورشاعان ورتانى جاقسارتۋ بويىشا 143 يدەيا كەلىپ ءتۇستى. جاس قازاقستاندىقتار اعىندى سۋلاردى تازارتۋ قۇرالدارىنىڭ ازىرلەمەلەرىن, قايتا وڭدەلگەن پلاستيك پەن پوليەتيلەن پاكەتتەردەن ءار ءتۇرلى بۇيىم ءوندىرۋدى, قوقىستى سۇرىپتاۋدى, بيوسومكەلەردى, جاسىل تەحنولوگيالاردى, ەكو-كەيتەرينگ پەن باسقا دا سونى يدەيالاردى ۇسىنىپ وتىر.
بايقاۋدىڭ جارتىلاي فينالىندا ون جوبانىڭ اۆتورى يدەيالارىن تانىستىردى. ەكولوگيا سالاسىنداعى ساراپشىلار قۇرامىنداعى قازىلار القاسى 7 ۇزدىك ازىرلەمەنى تاڭدادى. 15 ناۋرىزدا استانادا ولار 3 ملن تەڭگەنى قۇرايتىن گرانت ءۇشىن كۇرەسەتىن بولادى.
پاۆلودارلىق ستۋدەنت ۇلجان بايبەكوۆا ەسكى باننەرلەردەن سومكە ءوندىرۋدى رەتكە كەلتىرگىسى كەلەدى. بويجەتكەننىڭ ايتۋىنشا, ول دوستارىمەن بىرگە بىرنەشە ۇيىممەن كەلىسىپ, ولاردان قاجەتسىز بانەرلەرىن الاتىن بولادى. بۇل ماتەريالدىڭ ىدىراۋىنا مىڭ جىل قاجەت. جانعان كەزدە وتە زياندى گاز بولەدى.
«مەن ماتەماتيك ماماندىعىن يگەرۋدەمىن. بىراق, مەنى جانە مەنىڭ دوستارىمدى ەكولوگيا تاقىرىبى الاڭداتادى. وتكەن جىلدىڭ كۇزىندە Startup Weekend قاتىسقان كەزىمىزدە 300 مىڭ تەڭگە گرانتقا يە بولدىق. بۇل اقشا جوبامىزعا ديزاينەر مەن كاسىبي تىگىنشى شاقىرۋعا مۇمكىندىك بەردى. باننەرلەردەن سومكە عانا ەمەس, قالامساۋىتتار, كوسمەتيكاعا ارنالعان ساۋىتتار, كلاتچتار, شاباداندارعا ارنالعان قاپتار تىگۋگە بولادى. مۇنداي ءونىم شەتەلدە, مىسالى, امەريكادا جانە ءتىپتى كورشىلەس رەسەيدە ۇلكەن سۇرانىسقا يە. بۇل ەلدەردە وسىنداي ديزاينەرلىك زاتتاردىڭ قۇنى جوعارى. بۇگىندە بۇكىل الەمدە ادامداردىڭ قورشاعان ورتاعا كوزقاراسى وزگەردى. سوندىقتان كوپشىلىك ەكولوگيالىق ماتەريالداردى تاڭدايدى. باننەرلەر وتە مىقتى, بىراق ايازعا ءتوزىمسىز», – دەيدى ۇلجان بايبەكوۆا.
«دوستارىمىزبەن بىرگە پلاستيكالىق بوتەلكەلەردەن وتىرعىش ءوندىرۋدى باستادىق. بىرنەشە مەيرامحانامەن كەلىستىك: ءبىز ولاردىڭ قوقىسىن شىعارامىز, ال ولار بوتەلكەلەرىن جەكە جينايتىن بولادى. بوتەلكەلەردى قۇراستىرىپ, قاڭقاسىن قۇرايمىز دا ماتامەن قاپتايمىز. ەندى ءبىزدىڭ ءونىم بەرىكتىگى جاعىنان دۇكەن ونىمىنەن كەم تۇسپەيدى, ءارى بۇل رەتتە وتە ىڭعايلى بولىپ تابىلادى, دەيدى «3.2.1. ستارت!» بايقاۋىنا ءوز جوباسىمەن قوسىلعان قاراعاندىلىق ينتەرن حيرۋرگ تيمۋر كوروبەينيكوۆ.
بايقاۋدى ۇيىمداستىرۋشىلاردىڭ ءبىرى اليما يسەمباەۆانىڭ ايتۋىنشا, بايقاۋعا قاتىسۋعا نيەت بىلدىرگەندەردىڭ كوپ بولۋى قازاقستاندىق جاستاردىڭ وتە بەلسەندى جانە ەكولوگيا پروبلەمالارى جايلى ويلاناتىندارىن بىلدىرەدى.
«ادەتتە جاستاردا يدەيالارى دا جىگەر دە كوپ. الايدا, ولاردى ىسكە اسىرۋ ءۇشىن قاراجاتى مەن تاجىريبەسى جەتكىلىكسىز بولادى. «3.2.1. ستارت!» بايقاۋى قاتىسۋشىلارعا ارماندارىن جۇزەگە اسىرۋعا كومەكتەسۋگە ارنالعان. «3.2.1. ستارت!» بايقاۋىندا جارتىلاي فينالعا بارلىق قاتىسۋشىلار جوبالاردى قۇرۋ جانە ىلگەرى جىلدىتۋ بويىنشا ەكى كۇندىك تەگىن وقىتۋدان وتەدى. بىزدە گرانتتى ۇتىپ الماسا دا, ءبىلىم الىپ, ءوز ءىسىن باستاپ كەتكەن وتكەن جىلداردىڭ قاتىسۋشىلارى بار», – دەيدى اليما يسەمباەۆا.
ايناش ەسالي,
«Egemen Qazaqstan»
الماتى