ۆەدومستۆوارالىق كوميسسيانىڭ ءوڭىر باسشىسى بەردىبەك ساپارباەۆتىڭ توراعالىعىمەن وتكەن وتىرىسىندا جاسوسپىرىمدەر اراسىنداعى قىلمىستىڭ الدىن الۋ ماسەلەسى, سونىمەن قاتار, كوڭىل كوتەرۋ ورىندارىنداعى قىلمىستى ازايتۋ شارالارى قارالدى.
جىل باسىنان بەرى تۇنگى ۋاقىتتا سەرۋەنگە شىققان اقتوبەلىك جاسوسپىرىمدەردىڭ 128 اتا-اناسى اكىمشىلىك جاۋاپكەرشىلىك جازاعا تارتىلىپ, ولارعا 2 ملن تەڭگە ايىپپۇل تاعىلدى. وتكەن جىلدىڭ تەك تامىز ايىنان باستاپ 2 مىڭعا جۋىق اتا-انا ەسكەرتۋ الدى. جاستار ساياساتى باسقارماسىنىڭ باسشىسى نۇرلان كۇنتۋوۆ حابارلاعانداي, وڭىردە «جاس ساقشى» جاستار ءپاترۋلى ءوز جۇمىسىن جالعاستىرۋدا. بۇگىندە ستۋدەنتتەر بىرلەستىگىنىڭ قۇرامىندا 100 مىڭنان اسا جاس بار.
وبلىس اكىمى: «كامەلەتكە تولماعان قۇقىقبۇزۋشىلارمەن ماقساتتى جۇمىس ىستەۋ كەرەك. ستۋدەنتتەر جاتاقحاناسىندا ءتارتىپ بولۋى ءتيىس. قىلمىستىڭ دەنىن اۋدانداردان قالاعا وقۋعا كەلگەن ستۋدەنتتەر جاسايدى. ولاردىڭ بوس جۇرمەۋلەرىن باقىلاۋعا الىڭىزدار»,- دەپ تاپسىردى.
وبلىس باسشىسىنىڭ تاپسىرماسىمەن قۇرىلعان قۇقىقبۇزۋشىلىقتىڭ الدىن الاتىن ۆەدومستۆوارالىق جۇمىس توبى قوعامدىق جەرلەردە ءاردايىم رەيدتەر جۇرگىزىپ تۇرادى. بۇدان باسقا, جۇمىس توبى قوعامدىق قاۋىپسىزدىكتى قامتاماسىز ەتۋدەگى كوپتەگەن جۇيەلىك كەمشىلىكتەردى جويۋعا مۇمكىندىك بەرگەن بىرقاتار ءتيىمدى شارالاردى ۇيىمداستىردى.
بەردىبەك ساپارباەۆ كوڭىل كوتەرەتىن ورىندارعا ءاردايىم كەشكى رەيد جۇرگىزىپ وتىرۋدى تاپسىردى. تىركەلگەن قۇقىقبۇزۋشىلىقتار سانى كوبىرەك ورىن الاتىن ەلۋ كوڭىل كوتەرۋ ورنى ەندىگى باقىلاۋعا الىندى.
«ون كوڭىل كوتەرۋ ورنىندا انىقتالعان ەسكەرتۋلەر تولىقتاي جويىلدى, 15-ءى بەرىلگەن بۇيرىقتى ورىنداپ جاتىر, ءۇش نىساننىڭ باسشىسى اكىمشىلىك جاۋاپكەرشىلىككە تارتىلدى, سونىمەن قاتار, ەكى نىساننىڭ جۇمىسى توقتاتىلدى»,- دەپ باياندادى كاسىپكەرلىك جانە تۋريزم باسقارماسىنىڭ باسشىسى مىندەتىن اتقارۋشى اسقار كوكەەۆ.
سونداي-اق, اۋلالار مەن كوشەلەردە بەينە باقىلاۋ كامەرالارىن ورناتۋ جۇمىستارى جۇرگىزىلىپ جاتىر. اقتوبە بويىنشا 278 اۋلادا 1 358 كامەرا ورناتىلعان. 1 634 كوپقاباتتى ءۇيدىڭ اۋلاسى مەن كىرە بەرىسى تۇنگى ۋاقىتتا جارىقتاندىرىلادى. وبلىس اكىمى جۇرتشىلىقتى قۇقىقبۇزۋشىلىقتىڭ الدىن الۋعا تارتۋدى تاپسىردى.
ب.ساپارباەۆ: «حالىقتىڭ قاۋىپسىزدىگى بارىنەن جوعارى. قوعامدىق قاۋىپسىزدىكتى قامتاماسىز ەتۋدى بىرگە جۇرگىزۋ كەرەك. قۇقىققورعاۋ باعىتتىلىعىنىڭ قوعامدىق قۇرىلىمدارىنىڭ جۇمىسىن كۇشەيتۋ قاجەت»,- دەپ اتاپ ءوتتى.
جالپى, وسى جىلدىڭ باسىنان بەرى قىلمىستىق قۇقىقبۇزۋشىلىقتىڭ 10,4%-عا تومەندەگەنى تىركەلدى.