مال ۇرلىعىنىڭ الدىن الۋدا ەلەكتر توعى قولدانىلادى

«ۇرلىقتى اشقاننان گورى الدىن العان وڭاي» دەگەن ۇستانىمدى باستى ماقسات ەتكەن كريمينالدىق پوليتسيانىڭ جەدەل ۋاكىلدەرى اكىمدىكتىڭ, ۆەتەرينارلىق باسقارمانىڭ وكىلدەرىمەن بىرلەسىپ, جامبىل اۋدانىندا تۇرعىندارمەن كەزدەسۋلەر وتكىزدى. جيىنداردا ەركىن جايىلىمدا جۇرگەن مالدىڭ ۇرلانۋىنا, ولاردى تانۋعا قاتىستى سۇراقتار كوتەرىلىپ, ۆەتەرينارلىق قۇجاتتاردى بەرۋ ءتارتىبى ءتۇسىندىرىلدى. كازانكا اۋىلدىق وكرۋگىندە ورنالاسقان «شاتيلو ي ك» جشس-ءنىڭ وڭ تاجىريبەسى  مىسالعا كەلتىرىلدى. مۇندا  ءۇش جىلدان بەرى «ەلەكتروندى باقتاشى» جۇيەسى ءتيىمدى قولدانىپ كەلەدى. 1200 باسقا ارنالعان جايىلىم تومەنجيىلىكتى كەرنەۋلى سىممەن اينالا قورشالعان. ىشتەگى اشاتۇياقتىلار ەكى مالشىنىڭ باقىلاۋىندا. ناتيجەسىندە ءىرى قارا اشىق اسپان استىندا قاجەتتى ازىقپەن قورەكتەنىپ, اينالاعا جايىلمايدى. بۇل ءوز كەزەگىندە ۇرلىقتىڭ ىقتيمالدىعىن اناعۇرلىم ازايتىپ وتىر.  مال ۇرلىعىن ەڭسەرۋدەگى امالداردىڭ ءبىرى – جانۋارلاردى تاڭبالاۋ. بۇگىندە جامبىل اۋدانىندا 75 مىڭ باس مال تاڭبالانعان.

وپەراتسيا بارىسىندا مال ۇرلىعىنىڭ الدىن الۋدان بولەك, پوليتسيا قىزمەتكەرلەرى قىلمىستاردى انىقتاۋ جۇمىستارىنا دا ايرىقشا كوڭىل بولگەن. كريمينالدىق پوليتسيا باسقارماسىنىڭ باستىعى, پوليتسيا پولكوۆنيگى پەتر كليموۆتىڭ ايتۋىنشا, 40 موبيلدىك توپ قۇرىلىپ, 43 بەكەت قويىلعان. مال مەن ەت ونىمدەرىن تاسىمالدايتىن اۆتوكولىكتەر, بازارلار مەن بەلگىلەنبەگەن ساۋدا ورىندارى جۇيەلى تۇردە تەكسەرىلەدى. 13 باس مال يەلەرىنە قايتارىلدى. 13 قىلمىستىق ارەكەت اشكەرەلەندى. بۇرىن ءىستى بولعان 40 ادامنىڭ مال ۇرلىعىنا قاتىستىلىعى تەكسەرىلدى. مال مەن ەت ونىمدەرىن ءتيىستى قۇجاتتارسىز تاسىمالداۋدىڭ بىرنەشە فاكتىسى انىقتالدى.

ءومىر ەسقالي,

«ەگەمەن قازاقستان»

سولتۇستىك قازاقستان وبلىسى