شىمكەنتتىكتەر كورشىلەرىنە ىزەت كورسەتتى

شىمشاھارعا قاراستى  سايرام تۇرعىن الابىنداعى وزبەك ەتنوسىنىڭ بەلدى ازاماتتارى كورشىلەس شاپىراشتى, وتەمىس, قىزىلسۋ, تاسساي, مارتوبە, توعىس, بادام, قاراباستاۋ تۇرعىن الاپتارىنىڭ ابزال قاريالارىن, ابىرويلى ازاماتتارىن داستارحانعا سىيلى قوناق رەتىندە شاقىرىپ, ىزەتىن كورسەتتى. مەرەكەلىك جيىندا تۇرعىندار ءبىر-بىرىنە ءىلتيپات ءبىلدىرىپ, جەرگىلىكتى ەتنوس وكىلدەرى قازاق ەلىنە دەگەن اقەدىل العىسىن جەتكىزدى.

مەرەكەلىك شاراعا قاتىسقان قر پارلامەنتىنىڭ ەكس-دەپۋتاتى, وزبەك اقساقالى روزاقۇل حالمۇرادوۆ حالقىمىز 4 جىلدان بەرى اتاپ ءوتىپ كەلە جاتقان العىس ايتۋ كۇنىنىڭ ماڭىزىنا توقتالدى.

«وزدەرىڭىزگە بەلگىلى, قيىن-قىستاۋ زاماندا قازاق جەرىنە كوپتەگەن حالىقتار كۇشتەپ جەر اۋدارىلدى. سول كەزەڭدە جەرگىلىكتى جۇرتتىڭ ولارعا ۇلكەن قامقورلىق كورسەتكەنىن, وزدەرىنىڭ جاعدايى اۋىر بولسا دا, بارىن ءبولىسىپ, تاتۋ-ءتاتتى تىرلىك ەتكەنىن ەتنوس وكىلدەرىنىڭ بۇگىنگى ۇرپاقتارى ۇمىتپايدى. بۇل كۇندە بارلىق قازاقستاندىقتاردىڭ ءبىر-بىرىنە جانە وسى ادامداردى جاتسىنباي باۋىرىنا باسقان, بارىنشا قامقورلىق بىلدىرگەن قازاقتارعا العىس ايتۋى تاماشا داستۇرگە اينالىپ كەلەدى. بۇل مەرەكە - بىرتۇتاستىقتىڭ, ىنتىماقتاستىق پەن تاتۋلىقتىڭ مەرەكەسى»,  دەدى ر.حالمۇرادوۆ.

سونداي-اق مەرەكەلىك باسقوسۋدا بىرقاتار ەل اعالارى قۇتتىقتاۋ ءسوز سويلەپ, ىنتىماق, بىرلىكتىڭ ماڭىزى جونىندە ماعىنالى اڭگىمە ءوربىتتى. قالالىق ءماسليحات دەپۋتاتتارى, ءتۇرلى ەتنومادەني بىرلەستىكتىڭ باسشىلارى ەلدەگى بەرەكەلى بىرلىكتى ساقتاۋ جايلى ءسوز قوزعادى.

نۇرشات توكەن,

«Egemen Qazaqstan»

شىمكەنت