وتكەن بەيسەنبى كۇنى فۋتبولدان قازاقستان ۇلتتىق قۇراماسى تۇركيانىڭ انتاليا قالاسىندا فيفا رەيتينگىندە 170-ورىندا تۇرعان مولدوۆا قۇراماسىمەن جولداستىق كەزدەسۋ وتكىزدى. بۇل ۇلتتىق قۇرامانىڭ 2019 جىلعى جانە جاڭا باس باپكەر ميحال بيلەكتىڭ قول استىنداعى العاشقى ماتچى بولاتىن.
21 اقپان FIFA كۇنتىزبەسىنە ساي, كەزدەسۋلەرگە ارنايى بولىنگەن كۇن بولماعاندىقتان, بۇل كەزدەسۋ رەسمي جولداستىق كەزدەسۋ رەتىندە تىركەلگەن جوق. سوندىقتان بۇل ويىنعا رەسەيدىڭ «ۋفا» جانە «روستوۆ» كلۋبتارىندا دوپ تەبەتىن ەركەبۇلان سەيداحمەت پەن باحتيەر زاينۋتدينوۆ قاتىسا المادى. سونىمەن قاتار «قايرات» پەن «استانا» سەكىلدى ۇلتتىق قۇرامانىڭ نەگىزىن قالايتىن ويىنشىلارى بار كوماندالار دا فۋتبولشىلارىنىڭ جاراقات الىپ قالۋىنان قاۋىپتەنىپ, قۇراماعا نەگىزگى ويىنشىلارىن جىبەرمەدى. ايتسە دە, ميحال بيلەك مولدوۆاعا قارسى وتكەن ويىنعا قوسالقى قۇرامداعى فۋتبولشىلار مەن ۇلتتىق قۇراماعا ەنبەي جۇرگەن بىرنەشە جاس فۋتبولشىنى شاقىردى. مولدوۆا قۇراماسى دا جاسىل الاڭعا ەكىنشى قۇراممەن شىقتى.
«تيتانيك» ستاديونىندا وتكەن كەزدەسۋدە قازاقستان قۇراماسى 1:0 ەسەبىمەن جەڭىسكە جەتتى. ويىنداعى جالعىز گولدى ەكىنشى تايمدا الاڭعا شىققان جاس شابۋىلشى ورالحان ومىرتاەۆ سوقتى. بۇل ورالحاننىڭ ۇلتتىق قۇراماداعى ەكىنشى ويىنى جانە ەكىنشى گولى. بۇعان دەيىن ول بىلتىر ۇلتتار ليگاسى اياسىندا گرۋزياعا قارسى وتكەن ويىندا گول سالعان بولاتىن. قازاقستان قۇراماسىنىڭ قاتارىنا الىنا سالىپ, ءا دەگەننەن گول سوققان فۋتبولشىلار ساۋساقپەن سانارلىق. ولار باقتيار بايسەيىتوۆ, نۇركەن مازباەۆ, ۆلاديمير نيدەرگاۋس, ۆيكتور زۋبارەۆ سەكىلدى ساناۋلىلار عانا. ەندى ولاردىڭ قاتارىنا ورالحان ومىرتاەۆ تا قوسىلىپ وتىر. «ورالحان – قازاقستان فۋتبولىنداعى تالانتتى فۋتبولشىلاردىڭ ءبىرى. جاس ءارى جىلدامدىعى جوعارى.
بۇل قاسيەتتەر فۋتبولدا جاقسى باعالانادى. الايدا, ول شەبەرلىگىن ارتتىرۋ ءۇشىن كوپ ەڭبەك ەتۋى ءتيىس», دەيدى ميحال بيلەك.
جالپى مولدوۆا قۇراماسىنا قارسى ويىندا ۇلتتىق قۇرامانىڭ بىرقاتار جەتەكشى فۋتبولشىلارى ماتچقا قاتىسپاعانىمەن, باس باپكەر ميحال بيلەكتىڭ پىكىرىنشە قۇراماعا شاقىرىلعان جاس فۋتبولشىلار جاقسى ويىن ورنەگىن كورسەتكەن. «كەيبىر فۋتبولشىلار مولدوۆامەن وتەتىن ويىنعا ساناۋلى كۇندەر قالعاندا كەلدى. ۇلتتىق قۇرامانىڭ وقۋ-جاتتىعۋ جيىنىندا ءجۇرىپ, ءوز كلۋبتارىنىڭ ويىندارىنا قاتىسقاندار بولدى. مۇنداي جاعدايدا تولىق دايىندىق جۇرگىزۋ مۇمكىن ەمەس. ءار فۋتبولشىعا تالپىنىسى ءۇشىن العىس ايتامىن. ماتچ الدىندا جىگىتتەردىڭ جەڭىسكە جەتكىسى كەلەتىنىن بايقادىم. ۇزىلىستەن سوڭ دا ۇمتىلىسىن باسەڭدەتپەدى. كەيبىر فۋتبولشىلار ۇلتتىق قۇرامانىڭ قاتارىندا العاش رەت وينادى. وسىنداي قيىندىقتارعا قاراماستان, وڭ ناتيجەگە قول جەتكىزدىك», دەيدى باس باپكەر فۋتبول فەدەراتسياسىنىڭ ءباسپاسوز قىزمەتىنە بەرگەن سۇحباتىندا.
تاعى ءبىر ايتا كەتەرلىگى, مولدوۆاعا قارسى وتكەن ويىندا توعىز فۋتبولشى ۇلتتىق قۇراماداعى العاشقى ويىندارىن وتكىزدى. ولار: ساعادات تۇرسىنباي, تەمىرلان ەرلانوۆ, مارات بىستروۆ (ۇشەۋى دە – «ورداباسى»), بەكزات شادمانوۆ («تاراز»), ەركىن تاپالوۆ, راۋان ورىنباسار (ەكەۋى دە – «جەتىسۋ»), رافكات اسلان, («ەرتىس») جانە يگور شاتسكي, گەۆورگ نادجاريان (ەكەۋى دە – «شاحتەر»).
قازاقستان قۇراماسى بۇعان دەيىن مولدوۆا فۋتبولشىلارىمەن ءتورت رەت جولداستىق كەزدەسۋ وتكىزىپ, ءبىر ويىندا جەڭىسكە جەتىپ, ەكى ويىندا جەڭىلىپ قالعان. ال ءبىر كەزدەسۋ تەڭ ەسەپپەن اياقتالعان. ەندى كەشەگى ويىننان كەيىن ەكى قۇراما اراسىنداعى جەكە كەزدەسۋ بويىنشا ەسەپ تەڭەستى. ءار قۇرامانىڭ ەنشىسىندە ەكى جەڭىس, ەكى جەڭىلىس جانە ءبىر تەڭ ويىن بار.
ۇلتتىق قۇراما فۋتبولشىلارى كەلەسى كەزدەسۋىن 2020 جىلعى ەۋروپا چەمپيوناتىنىڭ ىرىكتەۋ كەزەڭى اياسىندا ەلورداداعى «استانا ارەنا» ستاديونىندا شوتلانديا قۇراماسىنا قارسى وتكىزەدى.
ءالي بيتورە,
«Egemen Qazaqstan»