«حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنىڭ جوباسىن تالقىلاۋ بارىسىندا قوعامدىق دەنساۋلىق ساقتاۋ ماسەلەلەرى قارالدى.
بۇگىن «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنىڭ جوباسىن كوپشىلىك الدىندا تالقىلاۋ اياسىندا دەنساۋلىق ساقتاۋ مينيسترلىگى, ددسۇ, ۇەۇ جانە ت. ب. وكىلدەرى قوعامدىق دەنساۋلىق ساقتاۋ ماسەلەلەرىن تالقىلاۋعا ۇسىندى.
قوعامدىق دەنساۋلىق ساقتاۋ ساياساتى دەپارتامەنتىنىڭ ديرەكتورى ايجان ەسماعامبەتوۆا كودەكس جوباسىنىڭ جاڭا باپتارىنا, اتاپ ايتقاندا, قوعامدىق دەنساۋلىق ساقتاۋدىڭ باسىم باعىتتارىنا, مەملەكەتتىك جانە قوعامدىق ينستيتۋتتاردىڭ سەكتورارالىق ءوزارا ءىس-قيمىلىنا, ۇلتتىق ۇيلەستىرۋ كەڭەسىنىڭ رولىنە, مينيسترلىكتەر مەن ۆەدومستۆولاردىڭ دەنساۋلىقتى ساقتاۋعا, ۇەۇ-نىڭ حالىق دەنساۋلىعىن ساقتاۋعا قاتىسۋىنا قاتىستى فۋنكتسيالارىنا, وكىلەتتىكتەرىنە جانە جاۋاپكەرشىلىك ايماقتارىنا توقتالدى.
قوعامدىق دەنساۋلىق ساقتاۋ ۇلتتىق ورتالىعى باقىلاۋ كەڭەسىنىڭ مۇشەسى تالاپقالي ىزمۇحامبەتوۆ: «الماتىدا قارت ادامداردىڭ 13%-دى قۇرايدى, ءبىز زەرتتەۋ جۇرگىزۋگە باستاماشى بولدىق, بۇل زەرتتەۋ 60 جاستان 75 جاسقا دەيىنگى ادامداردىڭ ەشقانداي اۋىر دەرتى جوق ەكەنىن كورسەتتى - ولار بەلسەندى, ولاردى بەلسەندى ءومىر سۇرۋگە ۇيرەتۋ قاجەت جانە وسىنىڭ ەسەبىنەن ءومىر ءسۇرۋ جىلدارى ۇزارماق», - دەدى. ول قالانىڭ الاتاۋ اۋدانىندا اكىمدىكتىڭ كاسىپكەرلەرگە 10 زەينەتكەردىڭ باسسەينگە تەگىن بارىپ, ساۋمال ءىشۋىن قاداعالاپ قولعا الۋى جونىندە ءوتىنىش بىلدىرگەنىن مىسالعا كەلتىردى – ءبىر جىل بويى ولاردىڭ ەشقايسىسىنا جەدەل جاردەم كەلمەدى جانە ولاردىڭ ەشقايسىسى دەنساۋلىق جاعدايىنا بايلانىستى اۋرۋحاناعا جاتپادى». «ناقتى قادامدار جاسالۋدا, ءبىز دۇرىس باعىتتا كەلە جاتىرمىز», - دەپ اتاپ ءوتتى ول.
«تالاپ» قولدانبالى زەرتتەۋ ورتالىعىنىڭ ديرەكتورى راحىم وشاقباەۆ دەنساۋلىق ساقتاۋ مينيسترلىگىنىڭ پروگرەسسيۆتى يدەيالاردى ىلگەرىلەتۋدەگى جۇمىسىن اتاپ ءوتتى. ول ازاماتتاردىڭ قۇقىقتارى جازىلعانىن, بىراق ولاردىڭ ءوز دەنساۋلىعى ءۇشىن جاۋاپكەرشىلىگىن ارتتىرۋ قاجەت ەكەندىگىن, كودەكستە جەكە تاراۋدى اۋا مەن سۋدىڭ لاستانۋىنان بولاتىن اۋرۋلاردىڭ الدىن الۋعا ارناۋ كەرەك ەكەندىگىن, تەمەكى شەگۋشىلەردىڭ قۇقىقتارىنا سالماقتى قاراۋ – تەمەكى تارتۋدى ازايتۋعا كۇش جۇمساۋ قاجەت ەكەندىگىن باسا ايتتى.
قوعامدىق دەنساۋلىق ساقتاۋ سالاسىنداعى ساراپشى گۇلنار كۋلكاەۆا جۇمىسكەرلەردىڭ دەنساۋلىعىن ساقتاۋ جونىندە, تمككك جانە ءمامس شەڭبەرىندە ولاردى پروفيلاكتيكالىق قاراپ-تەكسەرۋدەن وتكىزۋ ءۇشىن جاعداي جاساۋ بويىنشا جۇمىس بەرۋشىلەردىڭ مىندەتتەرىنە توقتالدى. سونداي-اق مەكتەپ مەديتسيناسى مەن جاستار دەنساۋلىق ورتالىقتارىنىڭ قىزمەتىنە, وقۋشىلار مەن جاستاردىڭ دەنساۋلىعىن قورعاۋ بويىنشا ءىس-شارالار وتكىزۋگە جانە قىزمەتتەر كورسەتۋگە قاتىسۋشىلاردىڭ نازارىن اۋداردى.
كودەكس جوباسىنىڭ جاڭا رەداكتسياسىن تالقىلاۋ بارىسىندا ءۇزىلىس كەزىندە سپيكەرلەر مەن بارلىق قاتىسۋشىلاردىڭ 3 مينۋتتىق جاتتىعۋ جاساعانىن ايتا كەتۋ كەرەك. وسىلايشا, ولار اعىمداعى جىلعى 15 اقپاندا دەنساۋلىق ساقتاۋ مينيسترلىگىنىڭ كەڭەيتىلگەن القا وتىرىسىنىڭ قاتىسۋشىلارى جاتتىعۋ جاساعان, دەنساۋلىق مينۋتىنا قولداۋ ءبىلدىردى.