قازاقستاندا وتاندىق وندىرىستەگى رت ماركالى اۆياتسيالىق وتىننىڭ كوتەرمە باعاسى ارزاندادى, دەپ حابارلادى «قازمۇنايگاز» ۇك» اق ءباسپاسوز قىزمەتىنەن.
«قازمۇنايگاز» ۇلتتىق كومپانياسى» اق اعىمداعى جىلدىڭ اقپان ايىنان باستاپ قازاقستاندىق ءوندىرىستىڭ رت ماركالى اۆياتسيالىق وتىنىنا كوتەرمە باعا تومەندەگەنى تۋرالى حابارلايدى», - دەلىنگەن جۇما كۇنى تاراتىلعان حاباردا.
حاباردا تۇسىندىرىلگەندەي, باعانىڭ وزگەرۋى اتىراۋ جانە پاۆلودار مۇناي وڭدەۋ زاۋىتتارىن جاڭعىرتۋدى اياقتاۋ اياسىندا اشىق ءتۇستى مۇناي ونىمدەرىن ءوندىرۋ جەلىسىنىڭ كەڭەيۋىنە نەگىزدەلگەن.
«جوعارىدا كورسەتىلگەن فاكتور ىشكى نارىقتى ەل ءۇشىن ستراتەگيالىق ماڭىزدى مۇناي ونىمدەرىمەن تولىق قامتاماسىز ەتۋگە جانە باعاسى قىمبات يمپورتتان باس تارتۋعا مۇمكىندىك بەردى», - دەلىنگەن حاباردا.
ەسكە سالساق, بۇعان دەينى حابارلانعانداي, قر باس پروكۋرورى قايرات قوجامجاروۆ پرەمەر-مينيستر باقىتجان ساعىنتاەۆتىڭ اتىنا جازىلعان ساۋالىندا كەلتىرگەن اقپارىنا سايكەس استانا مەن الماتىداعى اۆياتسيالىق وتىن باعاسى لوندونداعى, ماسكەۋدەگى, دۋباي مەن گونكونگتاعى باعادان قىمباتىراق.
اشىق دەرەك كوزدەرىنىڭ اقپارىنشا, «گازپرومنەفت», «روسنەفت» ۇك, «لۋكويل» جانە «تاتنەفت» قازاقستانداعى اۆياتسيالىق كەروسيندى نەگىزگى يمپورتتاۋشى-كومپانيالار بولىپ تابىلادى.