وبلىس ورتالىعىندا جاستار جىلىنا وراي ۇيىمداستىرىلعان جاڭا تەاتردىڭ تۇڭعىش قويىلىمى بولىپ ءوتتى. تىرناقالدى تۋىندى رەتىندە «ارماندار كەمەسى» اتتى شىعارما ساحنالاندى.
تانىمال جاس جازۋشى ايگيز بايمۋحامەتوۆتىڭ «تاستاماشى مەنى, انا» پوۆەسى نەگىزىندە الىنعان «ارماندار كەمەسى» اتتى قويىلىمدا بۇگىنگى قوعامداعى بالالاردىڭ الەۋمەتتىك ماسەلەسى وتكىر قامتىلعان. سانالۋان مىنەزدەر, ارقيلى تاعدىرلار سيپاتتالادى.
پرەمەرانى قازاق تىلىنە اۋدارىپ, ساحنالاعان رەجيسسەر فارحادبەك قانافين. باستى رولدەردى اقان سەرى اتىنداعى جوعارى مادەنيەت كوللەدجىنىڭ ستۋدەنتتەرى سومدادى. شىعارمانىڭ اۆتورىنىڭ ءوزى دە بالالار ۇيىندە تاربيەلەنىپتى. اتا-اناسىنان جاستاي ايرىلعاندىقتان بۇل تاقىرىپ قالامگەرگە ەتەنە تانىس. بالا كەزىنەن كوكىرەگىندە جيناقتالىپ قالعان زاپىراندى قاعاز بەتىنە تۇسىرگەن. شىعارمادان جەتىم بالالاردىڭ زار-مۇڭى, كوپ ادامعا ايتا بەرمەيتىن قايعى-قاسىرەتى, بۇيىعى ارمان, قارا شىمىلدىق تۇمشالاعان كەزەڭدەگى جۇرەكتەرىنە جارىق ساۋلە سەبەزگىلەگەن ءۇمىت وتى قىلاڭ بەرەدى.
شىعارمانىڭ باستى كەيىپكەرى ءىلياس تۇل جەتىم. ءار ادامنىڭ جارىق دۇنيەدەگى ەڭ جاقىنى, جاناشىرى, قادىرلىسى, قامقورشىسى اق ءسۇتىن بەرىپ ايالاعان ارداقتى اناسى ەكەندىگى بەلگىلى. مىنە, سونداي-اق, جاقىندارى اتا-اناسىنان ەرتە ايرىلۋ ىلياسقا وتە اۋىر تيەدى. تاعدىردىڭ سالعانىنا شارا بار ما؟ جەتىم قالعان ول باۋىرلارىمەن بىرگە بالالار ۇيىندە تاربيەلەنەدى. بالالارعا اتا-انالارىنىڭ ىستىق ماحاباتتى مەن قاناتتى قامقورلىعى جەتىسپەيدى. ولار سوعان سۋساۋى, سوعان ىنتىزار. بىراق, تىلدەگى تىلەكتىڭ تىرشىلىكتە وڭىنان ورالمايتىن ۋاقىتى دا بولادى. الەمدەگى جان بىتكەننىڭ ءبارى جەتىم دەسە باۋىر ەتى ەزىلىپ تۇرمايدى ەكەن عوي. ءتىپتى, بالالار ءۇيىنىڭ قىزمەتكەرلەرى مەن تاربيلەنۋشىلەرى تاراپىنان دا قاتىگەزدىككە ۇشىرايدى. وسىنىڭ بارلىعى «ارماندار كەمەسى» اتتى قويىلىمدا شىنايى سۋرەتتەلگەن.
بىردەن ايتا كەتۋ كەرەك, ءباز بىرەۋلەر بۇل ءومىردىڭ وزىنەن الىنعان كورىنىس دەسە, ەندى بىرەۋلەرى وتاندىق دراماتۋرگتەردىڭ وسى تاقىرىپتاعى ەڭبەكتەرى نەگە ساحنالانباعان دەگەن پىكىرلەرىن ايتۋدا. راسىندا دا, جۋىردا قۇرىلعان «EL jastar» تەاترىنىڭ شىمىلدىعى وتاندىق دراماتۋرگتەردىڭ تۋىندىلارىمەن اشىلعانى جاقسى بولار ەدى.
تەاتر پرەمەراسىنا بەلگىلى جازۋشى, جۋرناليست, رەسەي جازۋشىلار وداعىنىڭ مۇشەسى, شايحزادا بابيچ اتىنداعى باشقۇرتستان رەسپۋبليكاسى سىيلىعىنىڭ لاۋرەاتى, تەاتر قويىلىمىنا نەگىز بولعان «تاستاماشى مەنى, انا» پوۆەسىنىڭ اۆتورى ايگيز بايمۋحامەتوۆ قاتىستى.
بيىلعى جاستار جىلى اقمولا وبلىسى ىشكى ساياسات باسقارماسىنىڭ قولداۋىمەن «الداسپان-رۋح» قوعامدىق بىرلەستىگى جانىنان «EL jastar» تەاترىنىڭ اشىلۋى جاعىمدى جاڭالىق. تۇڭعىش پرەمەراسىن كوكشەتاۋ جۇرتشىلىعىنىڭ نازارىنا ۇسىنعان جاستار تەاترىنىڭ ۇيىمداستىرۋ ءىسىن بارشا كوكشەتاۋ جۇرتشىلىعىنا ەسىمى ءمالىم رەجيسسەر فارحاتبەك قانافين مەن جاس تەاترتانۋشى, اقان سەرى اتىنداعى كوكشەتاۋ جوعارى مادەنيەت كوللەدجىنىڭ وقىتۋشىسى حاكىم حاسامباي قولعا الىپ وتىر.
بايقال ءبايادىل,
«Egemen Qazaqstan»