ءارتۇرلى جاعدايلارعا بايلانىستى كەيدە كوشەدە باعدارشامدار جۇمىس ىستەمەي قالادى. مۇندايدا ەكى جاقتان كەلگەن كولىك يەلەرى ءبىرىنشى بولىپ وتۋگە تىرىسىپ ماشينالارىن جول ورتاسىنا سۇعىندىرىپ جىبەرەدى. ونىڭ ارتى – قۇلاق تەسكەن ايقاي, قىزىلكەڭىردەك داۋ.
مىنە, وسىنداي جاعداي قىزىلوردا قالاسىنداعى جىبەك جولى مەن سۇلتان بەيبارىس كوشەلەرىنىڭ قيىلىسىندا بولعان. وسى كەزدە ءبىر ازامات پوليتسيا قىزمەتكەرلەرى جەتكەنشە جول ورتاسىنا شىعىپ كوشە قيىلىسىنداعى رەتسىزدىكتى وزىنشە رەتتەگەن. بىلاي قاراعاندا, نيەتى جاقسى بولعانىمەن زاڭ جۇزىندە ازاماتتىڭ جاساعان ارەكەتى دۇرىس بولماي شىقتى.
بۇل جونىندە تۇسىنىك بەرگەن قىزىلوردا وبلىستىق پوليتسيا دەپارتامەنتىنىڭ ءباسپاسوز قىزمەتى: «كوشە قيىلىسىنا جاياۋ جۇرگىنشىگە شىعۋعا تىيىم سالىنادى. ويتكەنى ول ءوزىنىڭ قاۋىپسىزدىگىمەن قاتار كولىك قۇرالدارىنىڭ كوشە قيىلىسىنان وتۋىنە قاۋىپ تۋعىزادى. اتالمىش وقيعا بويىنشا باعدارشامنىڭ جۇمىس ىستەمەي قالعانى تۋرالى حابارلاما تىركەلگەن ۋاقىتتا پاترۋلدىك پوليتسيا بەكەتىنە جىبەرىلدى. ۋاقتىلى اتالعان كوشە قيىلىسىنا رەتتەۋشى قويىلدى. باعدارشامنىڭ جۇمىس ىستەمەۋى جانە كوشە بويىنشا كەپتەلىس بولعان كەزدە ءتيىستى ورىندارعا حابارلاسۋى ءتيىس», دەدى.
ەل ءىشى بولعان سوڭ ەلگەزەك ادامدار كوپ. پوليتسيا كەلگەنشە جول قوزعالىسىن رەتتەمەك بولعان الگى ازاماتقا اكىمشىلىك حاتتاما تولتىرىلعان. ماشينالار جۇلدىزداي اعىپ ءوتىپ جاتقان قيىلىستا وتپەن ويناۋعا بولمايدى. جول رەتتەگىش ازامات ءوز قاتەلىگىن كەش تۇسىنگەن سىڭايلى.
باقتيار تايجان,
«Egemen Qazaqstan»
قىزىلوردا وبلىسى