تاياۋدا «اگرارلىق نەسيە كورپوراتسياسى» اق باسقارما توراعاسى نارمۇحان سارىباەۆتىڭ ماسكەۋ قالاسىنا جۇمىس ساپارى بارىسىندا بريانسك ەت كومپانياسىمەن (بەك) قازاقستاندىق اۋىلشارۋاشىلىق تاۋار وندىرۋشىلەرىنە 5 مىڭ باس ابەردين-انگۋس اسىل تۇقىمدى مالدارىن جەتكىزۋ تۋرالى كەلىسىمشارتقا قول قويىلدى.
كەلىسىمشارت اياسىندا بارلىق ۆەتەرينارلىق-كارانتيندىك جانە ەپيزووتيالىق-پروفيلاكتيكالىق ءىس-شارالاردى جۇزەگە اسىرۋ ەسكەرىلگەن.
بريانسك ەت كومپانياسى رەسەيدەگى جەتەكشى ەت ءوندىرۋشى – «ميروتورگ» اگروونەركاسىپ حولدينگىنىڭ قۇرامىنا كىرەدى. بەك-ءتىڭ ونىمدەرى جوعارى حالىقارالىق ستاندارتتارعا سايكەس. كومپانيا مالدى گەنەتيكالىق تۇرلەندىرىلگەن قوسپالاردى, انتيبيوتيكتەردى, گورمونداردى جانە ءوسۋدى تەزدەتەتىن قوسپالاردى پايدالانباي, وزدەرىنىڭ تازا جەمشوپتەرىمەن وسىرەدى.
سونىمەن قاتار وسى كەلىسىمنىڭ اياسىندا بيىلعى كوكتەمدە اقمولا وبلىسىنداعى «AiZet Farms» ەت وڭدەۋ زاۋىتىمەن 1000 باس اسىل تۇقىمدى مال جەتكىزۋ تۋرالى, «متس «جايما» جشس-مەن (پاۆلودار وبلىسى) اگرارلىق نەسيە كورپوراتسياسىنىڭ قارىز الۋشىلارىنا ارنالعان 5 مىڭ ءىرى قارا مال باسىن وسى جازدا جەتكىزۋ جونىندە وپەراتورلىق كەلىسىمشارتتارعا قول قويىلماق.
سۇڭعات ءالىپباي,
«Egemen Qazaqstan»