پانفيلوۆ اۋدانىنداعى وسەك وزەنى باستاۋىن الاتاۋ بوكتەرىنەن الادى. ادەتتە تاۋ سۋىنىڭ ارىنى قاتتى بولاتىنى انىق, بىراق تابيعي تازا دا ءمولدىر وزەن بويىندا بالىق شارۋاشىلىعىن دامىتۋعا ەش كەدەرگى جوق ەكەن.
اۋدانداعى «Kaz-Aqua» سەرىكتەستىگىنىڭ ماماندارى بۇل ماسەلەنىڭ شەشىمىن تاۋىپتى. شارۋاشىلىق وزەن سۋىنا ارتيزان قۇدىقتىڭ سۋىن قوسىپ, بالىقتىڭ قالىپتى ءومىر سۇرۋىنە قولايلى جاعداي جاساپ قويعان. قازىر مۇندا بەكىرە تۇقىمداس بالىقتىڭ بىرنەشە ءتۇرى قولدان كوبەيىپ جاتىر.
«Kaz-Aqua» بالىق شارۋاشىلىعىنىڭ قاراماعىندا 2 بالىق ءوسىرۋ بازاسى بار ەكەن. بۇل جەردە 15 ادام بەكىرە بالىعىن بالاشا «باعىپ-قاعىپ», تۇقىمىن كوبەيتۋمەن اينالىسادى. تاۋ سۋى مەن جەراستى سۋىنىڭ قۇرامى اسىرەسە فارەل بالىعىنىڭ ۋىلدىرىق شاشۋىنا قولايلى ەكەن. قازىر تابيعي جولمەن كوبەيگەن بالىقتىڭ سانى ءوستى. ناتيجەسىندە اۋماقتاعى بالىق پەن بالىق ونىمدەرىنە سۇرانىس وتەلىپ, تابىس ارتىپ كەلەدى. شارۋاشىلىق بالىقتىڭ قورەگىنە قاجەتتى قوسپانى شەتەلدەن الدىرادى ەكەن.
- جىلىنا 100 توننا بالىق ونىمدەرىن دايىنداۋدى جوسپارلاعان «Kaz-Aqua» جاۋاپكەرشىلىگى شەكتەۋلى سەرىكتەستىگى الداعى ۋاقىتتا بالىق ونىمدەرىن قايتا وڭدەيتىن تسەح سالماقشى. سونداي-اق, بولاشاقتا ارنايى تۋريستىك ايماق اشىلىپ, كەلگەن قوناقتارعا بالىق اۋلايتىن مۇمكىندىك قاراستىرىلادى. ەندى جازيرالى جاركەنت وڭىرىندە كاسپيگە بارماي-اق بەكىرە بالىعىن اۋلاۋعا مۇمكىندىك بار, - دەدى ءبىزدى بالىق شاۋاشىلىعىنىڭ جاي-كۇيىمەن تانىستىرعان پانفيلوۆ اۋدانى اكىمىنىڭ ءباسپاسوز حاتشىسى نۇربول قاناعات.
قالماحانبەت مۇقامەتقالي,
«Egemen Qazaqstan»
الماتى وبلىسى