بۇگىن استانادا قر يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ 2018 جىلى اتقارعان جۇمىس قورىتىندىسى مەن 2019 جىلدىڭ جوسپارلارىن ايقىنداۋعا ارنالعان كەڭەيتىلگەن القا ءماجىلىسى ءوتتى.
القا ماجىلىسىندە «نۇرلى جول» مەملەكەتتىك باعدارلاماسىنىڭ ىسكە اسىرىلۋ بارىسى, اۆتوجول سالاسىنىڭ 2019 جىلعا جوسپارلانعان نەگىزگى مىندەتتەرى, قۇرىلىس ساپاسىنا, رەسپۋبليكالىق جانە جەرگىلىكتى جەلى اۆتوجولدارىن جوندەۋ مەن كۇتىپ ۇستاۋعا قاتىستى ماسەلەلەر تالقىلاندى. كوميتەتتىڭ القا ماجىلىسىنە قر پرەمەر-ءمينيسترىنىڭ ءبىرىنشى ورىنباسارى اسقار مامين, يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك, «قازاۆتوجول» ۇك» اق, «قازاقاۆتوجول» جشس, «قازجول عزي» جشس-ڭ جانە مەردىگەر ۇيىمداردىڭ وكىلدەرى قاتىستى.
ءبىرىنشى ۆيتسە-مينيستر رومان سكليار اتاپ وتكەندەي, بيىل بولىنگەن قارجىعا رەسپۋبليكالىق ماڭىزى بار 4,4 مىڭ كم اۆتوجول سالىنادى جانە قايتا جاڭعىرتىلادى. سونداي-اق, 654 كم جولدا قوزعالىستى اشۋ, 1 600 كم جولدى جوندەۋ جوسپارلانىپ وتىر. 2019 جىلى ۇكىمەتتىك زايم ەسەبىنەن اۆتوموبيل جولدارى كوميتەتى 4 جوبا بويىنشا 553 كم اۆتوجولدا جۇمىس جۇرگىزەدى. ولار: «قاندىاعاش-ماقات» (299 كم), «جەتىباي-جاڭاوزەن» (73 كم), «كۇرتى-بۋرىلبايتال» (85 كم), «ۇزىناعاش-وتار» 2 ۋچاسكە بويىنشا (54 كم).
«ورتالىق-شىعىس ءدالىزى بويىنشا (905 كم) جۇمىس باستالعالى 643 كم جول پايدالانۋعا بەرىلدى, بيىل 262 كم جولدا قۇرىلىس جۇمىستارى جۇرگىزىلەدى. ورتالىق-وڭتۇستىك ءدالىزى بويىنشا (1 292 كم) جۇمىس باستالعالى بەرى الماتى-قاپشاعاي جانە استانا-قاراعاندى بولىگىندە 275 كم جول پايدالانۋعا بەرىلدى. بيىل ءدالىزدىڭ قالعان بولىگىندە قۇرىلىس جۇمىستارى جۇرەتىن بولادى (1 017 كم)», - دەپ حابارلادى رومان سكليار.
اقتوبە-اتىراۋ-استراحان اۆتوجولى بويىنشا رەسپۋبليكالىق بيۋدجەت ەسەبىنەن 120 كم بولاتىن اتىراۋ-استراحان جانە قاندىاعاش-ماقات ۋچاسكەلەرىندە جۇمىستار جالعاسادى. بۇگىنگى كۇنى بۇل ۋچاسكەلەر بويىنشا دايىندىق جۇمىستارى باستالدى, تەحنيكا مەن جۇمىسشىلار شوعىرلاندىرىلۋدا.
القا ماجىلىسىندە اۆتوجول سالاسىنىڭ پروبلەمالىق ماسەلەلەرى بويىنشا «BI RoadCostructions» جشس باسقارما توراعاسى باۋىرجان يساباەۆ پەن «Citic» جشس-ڭ باس ديرەكتورى ۆۋ سياودۋن بايانداما جاسادى. سونداي-اق, «قازجول عزي» جشس-ڭ پرەزيدەنتى باعدات تەلتاەۆ اۆتوموبيل جولدارىن سالۋ مەن جاڭعىرتۋ سالاسىنداعى جاڭا تەحنولوگيالار تۋرالى ايتتى. وتىرىس سوڭىندا ناقتى تاپسىرمالار بەرىلدى.