بازالىق مەتاللداردىڭ الەمدىك قۇنىنىڭ تومەندەۋىنە, نەگىزگى ساۋدا سەرىكتەستەرىنە قاتىستى سانكتسيالارعا (يران, رەسەي) جانە باسقا دا سىرتقى فاكتورلارعا قاراماستان, ونەركاسىپ 2018 جىلدىڭ قورىتىندىسى بويىنشا 4,1%-كە ءوستى. اتاپ ايتقاندا, تاۋ-كەن ونەركاسىبى 4,6%-كە, وڭدەۋ ونەركاسىبى 4%-كە ءوستى. بۇل تۋرالى يندۋستريا جانە ينفراقۇرىلىمدىق دامۋ ءمينيسترى جەڭىس قاسىمبەك بەيسەنبى كۇنى ۆەدومستۆو القاسىنىڭ وتىرىسىندا ايتتى.
«وڭدەۋ سەكتورىنداعى ءوسىمنىڭ نەگىزگى درايۆەرلەرى مىنالار: مەتاللۋرگيا +2,2%, ماشينا قۇراستىرۋ + 14,1%, حيميا ونەركاسىبى +8,1%, جەڭىل ونەركاسىپ +4,4%. تاۋ-كەن ءوندىرىسى سەكتورىندا تەمىر كەنى ءونىمىنىڭ كولەمى «سوكولوۆ-سارىباي تاۋ-كەن بايىتۋ وندىرىستىك بىرلەستىگى» اكتسيونەرلىك قوعامىندا ءوندىرىس كولەمىنىڭ ارتۋى ەسەبىنەن 6,5%-كە ءوستى. ءتۇرلى ءتۇستى مەتالل كەنى ءونىمىنىڭ كولەمى ەكى ماڭىزدى جوبانى ىسكە قوسۋ ەسەبىنەن ارتتى. ولار: «باقىرشىق تاۋ-كەن ءوندىرىسى كاسىپورنى» تاۋ-كەن بايىتۋ كەشەنى جاۋاپكەرشىلىگى شەكتەۋلى سەرىكتەستىگى جانە «Sary-Arka Copper Processing» جشس» دەدى مينيستر ءوز بايانداماسىندا.
سونىمەن قاتار مينيستر ءتۇرلى-ءتۇستى مەتاللۋرگيادا وندىرۋ كولەمى «قازاقمىس كورپوراتسياسى» مەن «كازتسينك» جاۋاپكەرشىلىگى شەكتەۋلى سەرىكتەستىكتەرىندە ارتقانىن ايتىپ ءوتتى.