«ەۋرازيالىق بانك» «استانا بانكى» كليەنتتەرىنە 35,2 ملرد تەڭگەگە جۋىق سوماعا كەپىلدى وتەماقى تولەدى. بۇل «استانا بانكى» سالىمشىلارى الدىنداعى 37,5 ملرد تەڭگەگە تەڭ مىندەتتەمەلەرىنىڭ جالپى سوماسىنان 93,7%-دى قۇرايدى دەپ حابارلادى ۇلتتىق بانكتىڭ ءباسپاسوز قىزمەتى.
اقى تولەۋ 2019 جىلعى 26 قاڭتاردا باستالدى, وسى ۋاقىتتا بانك «استانا بانكى» 41 866 كليەنتىنە قىزمەت كورسەتتى. ءبىر سالىمشىعا قىزمەت كورسەتۋدىڭ ورتاشا ۋاقىتى 5 – 15 مينۋت ارالىعىندا بولدى.
بۇدان باسقا, 3211 كليەنت تولەم كارتاسىنا قاشىقتان تاپسىرىس بەرۋ مۇمكىندىگىن تاڭدادى, ولارعا شامامەن 2,1 ملرد تەڭگە ەسەپتەلدى.
«استانا بانكى» كليەنتتەرى اعىنىنىڭ ايتارلىقتاي ازايۋىنا بايلانىستى بانك قازاقستاننىڭ ءىرى قالالارىندا «استانا بانكى» سالىمشىلارىنا ارنالعان 9 ارنايى اقى تولەۋ ورتالىعىن جاپتى.
وتەماقى تولەۋ بولىمشەلەردىڭ جۇمىس رەجيمىنە سايكەس بانكتىڭ جەكە تۇلعالارعا قىزمەت كورسەتەتىن بارلىق بولىمشەلەرىندە 2019 جىلعى 26 شىلدەگە دەيىن جالعاسادى.
بانكتىڭ ۆەب-سايتىندا - eubank.kz – ونلاين رەجيمدە بولىمشەلەردە كەزەكتە كۇتىپ تۇرعان كليەنتتەردىڭ سانىن قاراۋعا بولادى, سونداي-اق تولەنۋگە ءتيىس كەپىلدى وتەماقى سوماسىن تەكسەرۋگە بولادى.
وتەماقى قازاقستاننىڭ دەپوزيتتەرگە كەپىلدىك بەرۋ قورىنىڭ قاراجاتىنان – جيناقتالعان سىياقىنى ەسكەرە وتىرىپ «استانا بانكى» كليەنتتەرىنىڭ سالىمدارى, اعىمداعى شوتتارى جانە تولەم كارتوچكالارى بويىنشا تولەنەدى.
2019 جىلعى 26 شىلدەدەن كەيىن اگەنت بانكتىڭ بولىمشەلەرىنە جۇگىنبەگەن سالىمشىلاردىڭ وتەماقى تولەۋ تۋرالى ءوتىنىشتى تىكەلەي قازاقستاننىڭ دەپوزيتتەرگە كەپىلدىك بەرۋ قورىنا بەرىپ, وتەماقىنى قولما-قول ەمەس اۋدارىم ارقىلى الۋعا مۇمكىندىگى بولادى.