ەلباسى كىتاپحاناسىندا جاستار جىلىنا ارنالعان « ۇلى دالا جاستارى» اتتى مادەني-كورمەلىك ءىس-شارالار توپتاماسىنىڭ سالتاناتتى اشىلۋى ءوتتى. مادەني شارا – قازاقستان بەينەلەۋ ونەرىنىڭ زاماناۋي ۇردىستەرىمەن تانىسۋعا مۇمكىندىك بەرەتىن بىردەن-ءبىر جوبا.
جيىنعا بەلگىلى وتاندىق سۋرەتشىلەر مەن مۇسىنشىلەر, مۋزىكانتتار, قازاقستانداعى شەت مەملەكەتتەردىڭ ەلشىلەرى مەن ديپلوماتيالىق وكىلدىكتەردىڭ قىزمەتكەرلەرى, ەلوردالىق ۋنيۆەرسيتەتتەردىڭ جەتەكشىلەرى, وقىتۋشىلار مەن ستۋدەنتتەر قاتىستى. ەلباسى كىتاپحاناسى ديرەكتورىنىڭ ءبىرىنشى ورىنباسارى ءامىرحان راحىمجانوۆ سالتاناتتى جيىندى اشىپ, قاتىسۋشىلارعا ساتتىلىك تىلەدى.
– ەلباسى كىتاپحاناسى جاستار جىلىنا ارنالعان اۋقىمدى ءىس-شارالار توپتاماسىن باستايدى. سولاردىڭ قاتارىندا «جاستار – ەل تىرەگى» كەشەندى تاقىرىپتىق كورمەمىزدى, زاماناۋي سۋرەتشىلەرىمىزدىڭ, مۇسىنشىلەرىمىزدىڭ, ساندىك-قولدانبالى ونەر شەبەرلەرىمىزدىڭ, ونەرتانۋشىلارىمىزدىڭ شىعارماشىلىعىن ناسيحاتتاۋعا, قولداۋعا باعىتتالعان بايقاۋىمىزدى جاريالايمىز. جاس ۇرپاقتىڭ تاربيەسى – ادامزاتتىڭ ماڭگىلىك تاقىرىبى. ەندەشە, بۇگىنگى كورمەمىز دە, الداعى ۋاقىتتاعى ونەر تۋىندىلارى جايلى ءىس- شارالارىمىز دا اسىرەسە جاستاردىڭ ەڭبەكقورلىعىنا, تالاپ-تiلەگiنە, ارمان-مۇراتىنا بايلانىستى. ولار اتا-بابالارىمىزدان مۇرا بولىپ كەلە جاتقان قۇندىلىقتارىمىزدى, تاريحي داستۇرلەرiمiزدi جاڭعىرتىپ قانا قويماي, ەل ەكونوميكاسى مەن عىلىمىن دامىتۋعا دا كۇش سالۋ كەرەك. ولاي بولسا, قۇرمەتتى بايقاۋعا قاتىسۋشى جاستار! سىزدەردى بۇگىن باستاۋ العان بايقاۋ جۇمىسىنا بەلسەنە قاتىسۋعا شاقىرامىن, – دەدى ول.
سونداي-اق «استانا قالاسىنىڭ سۋرەتشىلەر وداعى» قوعامدىق بىرلەستىگىنىڭ توراعاسى جانۇزاق ءمۇساپىر ءسوز الىپ, جوبانىڭ تالانتتى جاستاردى تانىتاتىن بەرەرى مول باعدارلاما ەكەنىن ايتتى.
– ەلباسى كىتاپحاناسى مەن استانا قالاسىنىڭ سۋرەتشىلەر وداعى ۇلكەن جوبانى قولعا الىپ وتىر. بۇل – ءبىزدىڭ جاستاردىڭ العا قويعان ماقساتتارىن, ونەر سالاسىنداعى ويلارىن دامىتۋدىڭ ءبىر تەتىگى. ءبىزدىڭ العا قويعان ماقساتىمىز – جاستاردى ونەرگە باۋلۋ, ولاردىڭ شىعارماشىلىقتارىن حالىققا جەتكىزىپ ودان ءارى الەمگە تانىتۋ. بولاشاقتا باسقا دا اۋقىمدى شارالاردى بىرلەسە جۇزەگە اسىرامىز, – دەيدى جانۇزاق ءمۇساپىر.
«جاستار – ەل تىرەگى» اتتى كەشەندى تاقىرىپتىق كورمەدە قازاقستاننىڭ جاستار الەۋەتىن ىسكە اسىراتىن ءبىلىم, عىلىم, قوعامدىق قىزمەت, مادەنيەت پەن سپورت سىندى نەگىزگى سالالار قامتىلدى.
– مەنىڭ سۋرەت ونەرىمەن اينالىسىپ كەلە جاتقانىما جيىرما جىلدان استى. بىلتىر ءوزىمنىڭ جەكە كورمەمدى وتكىزدىم. جاستار جىلىنا وراي ۇيىمداستىرىلعان بۇگىنگى كورمەگە «تىرشىلىك قامى» دەگەن تۋىندىمدى ۇسىندىم. مۇنداي كورمەلەر ءوزىم سياقتى جاس سۋرەتشىلەرگە تاپتىرماس تاجىريبە دەر ەدىم. ويتكەنى وسىنداي مادەني شارالارعا قاتىسۋ ارقىلى كوپ نارسەنى ۇيرەنىپ, شابىتىمىزدى شارىقتاتا تۇسەمىز, – دەپ وي ءبولىستى جاس سۋرەتشى رۇستەم بەركىنباەۆ.
كورمە بارىسىندا حابارلانعانداي, جاس سۋرەتشىلەر, مۇسىنشىلەر, ساندىك-قولدانبالى ونەر شەبەرلەرى مەن ونەرتانۋشىلار اراسىنداعى ەڭ ۇزدىك كوركەم شىعارمالار بايقاۋى جاريالاندى. ماۋسىم, جەلتوقسان ايلارىندا قورىتىندىلاناتىن بايقاۋ ناتيجەسى نەگىزىندە ۇزدىك شىعارمالاردىڭ كورمەسى ۇيىمداستىرىلىپ, بايقاۋ جۇمىستارىنىڭ كاتالوگى باسىپ شىعارىلادى.
ايا ءومىرتاي,
«Egemen Qazaqstan»