استانا اكىمى حالىققا ەسەپ بەرۋ كەزدەسۋىندە حالىقتىڭ الەۋمەتتىك ءالسىز توپتارىن قولداۋعا باستى نازار اۋداردى. بۇل تۋرالى استانا قالاسى اكىمدىگىنىڭ رەسمي سايتى حابارلادى.
ب. سۇلتانوۆتىڭ ايتۋىنشا, استانا اكىمدىگىنە كوپبالالى وتباسىلارعا بەرىلەتىن اتاۋلى الەۋمەتتىك كومەك ماسەلەسىنە قاتىستى كوپتەگەن سۇراق تۇسەدى. الەۋمەتتىك قورعاۋ – اكىمدىك ءۇشىن الدىڭعى قاتارداعى باسىمدىقتى مىندەت.
«كوپبالالى وتباسىلارعا بەرىلەتىن اتاۋلى الەۋمەتتىك كومەك – كۇن تارتىبىندەگى ەڭ وزەكتى ماسەلە. ناقتى اقپار انىقتالىپ جاتىر. قازىرگى كۇنى ەسەپتەۋ ادىستەمەسىنىڭ ەرەكشەلىكتەرىنە ساي 10 مىڭ وسىنداي وتباسىنىڭ تەك 4% (بارلىعى 434 وتباسى) عانا اتاۋلى الەۋمەتتىك كومەك الۋدا. بۇل – وتە تومەن كورسەتكىش. قانشا قاراجات بولىنگەنمەن, ءبىز سول قاراجاتتى تيەسىلى جەرگە جەتكىزە الماي وتىرمىز. بۇل سول وتباسىلارعا بولىنگەن قاراجات قوي. نەگە كەرىسىنشە جاعداي تۋىندادى؟ ماسەلەنى قاراستىرىپ انىقتادىق. ول جەردە قاراپايىم ادام تۇسىنە بەرمەيتىن كوپ ماسەلە بار. قازىر ول ءبىزدىڭ باستى مىندەتىمىز بولىپ وتىر», دەدى ب. سۇلتانوۆ.
بۇل رەتتە ول اتاپ وتكەندەي, بارلىق تىركەلگەن وتباسى وزدەرىنە ءتيىستى كومەكتى الۋ قاجەت. ال تىركەلمەگەندەر تىركەلۋى كەرەك.
«بۇل ماسەلەنى ءبىزدىڭ الدىمىزعا ەلباسى قويىپ وتىر. الەۋمەتتىك قورعاۋ – بۇل باستى مىندەت. بۇل تەك كوپبالالى نەمەسە از قامتىلعان وتباسىلارعا عانا ەمەس, مۇگەدەكتەر, زەينەتكەرلەر, ۇلى وتان سوعىسىنا قاتىسۋشىلار مەن باسقا دا ساناتتاعىلارعا قاتىستى », دەدى قالا اكىمى.