12-16 اقپان كۇندەرى ورال قالاسىندا بادمينتوننان توپ-16 ءتۋرنيرى اياقتالىپ, جەڭىمپازدار مەن جۇلدەگەرلەر ەسىمى انىقتالدى دەپ حابارلايدى Olympic.kz.
ەلىمىزدەگى ەڭ ۇزدىك بادمينتونشىلار جينالعان جارىستا ۇلتتىق قۇراما كوشباسشىسى دميتري پانارين (قوستاناي) قارسىلاس شاق كەلتىرگەن جوق. ول ەرلەر اراسىنداعى باسەكەدە توپ جارىپ, چەمپيون اتاندى.
كۇمىس جۇلدەنى تۇركىستان وبلىسىنىڭ وكىلى حايتمۇرات قۇلماتوۆ يەلەنسە, ۇزدىك ۇشتىكتى تاعى ءبىر قوستانايلىق سپورتشى ارمان مىرزابەكوۆ تۇيىقتادى.
قىزدار اراسىنداعى فينالدىق كەزدەسۋدە تۇركىستان وبلىسىنىڭ نامىسىن قورعاعان ايشا جۇمابەك پەن كاميلا سىزدىقوۆا كەزدەسىپ, العاشقىسى جەڭىسكە جەتتى.
قولا جۇلدە قوستانايلىق ناتاليا سازونوۆانىڭ ەنشىسىندە.
بادمينتوننان ۇلتتىق قۇرامانىڭ باس باپكەرى اسقار ورمانوۆ بۇل ءتۋرنيردىڭ وتكىزىلۋى ماقساتىن ءتۇسىندىردى.
«ۇزدىك 16 سپورتشىنىڭ باسىن قوسقان سەبەبىمىز بىرەۋ. 19-26 مامىر ارالىعىندا قىتايدا بادمينتوننان كوماندالىق ەسەپتەگى الەم چەمپيوناتى وتەدى. سول سىنعا قاتىساتىن كوماندا جاساقتاۋ ءۇشىن ەل ۇزدىكتەرىن تاعى دا جينادىق. شىنى كەرەك, سپورتشىلاردىڭ دايىندىعى مەن ءتۋرنيردىڭ ءوتۋ بارىسى كوڭىلىمىزدەن شىقتى. جۇلدەگەرلەر ءتىزىمىن بايقاعان بولساڭىز, نەگىزىنەن قوستاناي مەن تۇركىستان وبلىسىنىڭ سپورتشىلارى الدا ەكەنىن بايقاۋعا بولادى. قازىر وسى ەكى وبلىس بادمينتونشىلارى جوعارى باسەكەلەستىك تۋعىزۋدا. وسى جارىستان سوڭ قىتايداعى الەم چەمپيوناتىنا كىمدەر قاتىساتىنىن جوسپارلادىق. ناقتى كىمدەردىڭ باراتىنىن الەمدىك دودا جاقىنداعان سوڭ ايتامىز. ال ءدال قازىرگى ساتتە ەرلەر قۇراماسى ۋگاندادا وتەتىن الەم كۋبوگى كەزەڭىنە كەتكەنىن حابارلاعىم كەلەدى. دميتري پانارين, حايتمۇرات قۇلماتوۆ جانە ارتۋر نيازوۆ رەيتينگىلىك الەم كۋبوگىنە اتتانىپ كەتتى», - دەيدى باس باپكەر.