شيەلىدە كوپىر مەن اينالما جول جوندەۋدەن ءوتتى. جاڭادان تارتىلعان جول اۋدانداعى ۋران وندىرەتىن كاسىپورىندارعا قاجەتتى حيميالىق قىشقىلداردى تاسىمالداۋ ءۇشىن كەرەك بولعان.
قازاقستاننىڭ ەكونوميكاسى كوتەرىلىپ, الەمدەگى ىرگەلى مەملەكەتتەرمەن باسەكەلەسۋ ءۇشىن قۋاتتى كاسىپورىندار كەرەك. بىراق ءوندىرىس ورىندارىنىڭ توقتاۋسىز جۇمىس ىستەۋىنە قاجەتتى حيميالىق زاۋىتتاردىڭ ەكولوگياعا, ادام دەنساۋلىعىنا زيانى بارىن ايتپاسقا بولمايدى. ماسەلەن, فوسفور الۋ ءۇشىن قازىلعان ۇڭعىعا ءسىلتى قىشقىلى قۇيىلادى. وسىنداي ۇڭعىلاردان شىققان سۋدى مال ءىشىپ, ۋلانعان وقيعالار بار.
جاڭا جول تۋرالى ەرەكشە ايتىپ وتىرعانىمىز, ۋران وندىرۋگە قاجەتتى قاۋىپتى قىشقىلداردى تاسىمالداعان كولىكتەر شيەلىنىڭ ىرگەسىندەگى ەڭبەكشى اۋىلىن جاناي وتەتىن. اۋىل تۇرعىندارى ويقى-شويقى جولدا كۇكىرت تاسىمالداعان جۇك ماشينالارىنىڭ بىرنەشە رەت اۋدارىلعاندىعىن ايتاتىن. جارامسىز جول ەكولوگيالىق احۋالدى شيەلەنىستىرىپ جىبەرگەننەن كەيىن تۇرعىندار ءتيىستى ورىندارعا شاعىم تۇسىرگەن بولاتىن. شيەلى اۋدانىنىڭ اكىمى ءاشىم ورازبەك ۇلى «قازاتومپروم» اق باسشىلىعىنا وبلىس اكىمى قىرىمبەك كوشەرباەۆتىڭ ارنايى شىعىپ, جاعدايدى تۇسىندىرگەننەن كەيىن وسى ماسەلەنىڭ وڭتايلى شەشىلگەندىگىن ايتادى. بۇگىندە كۇكىرت تاسىمالداعان ماشينالار ەڭبەكشى اۋىلىنىڭ سىرتىمەن وتەدى.
كەشەگە دەيىن حيميالىق زاتتاردى ساقتايتىن قويما اۋدان ورتالىعىندا بولىپ كەلگەن. ەندى قويما تۇرعىندارعا قاۋىپسىز جەرگە كوشىرىلدى. كوكشوقى ەلدى مەكەنىندەگى كاسىپورىن دا يندۋستريالىق ايماقتان ورنىن تاپتى.
وسىلايشا, اۋدان حالقىن الاڭداتقان ءوندىرىس ورنى تۇرعىنداردىڭ ءوتىنىشى بويىنشا قاۋىپسىز ايماققا كوشىرىلىپ, جۇمىسىن باستاپ كەتتى.
باقتيار تايجان,
«Egemen Qazaqstan»
قىزىلوردا وبلىسى