استانا قالاسىنداعى نۇرسۇلتان نازارباەۆ حالىقارالىق اۋەجايىندا (1-تەرمينال) كوممەرتسيالىق جانە وندىرىستىك نىساندارداعى اۋقىمدى كەڭىستىكتەردى تازالاۋعا ارنالعان اۆتونومدى تازالاعىش روبوت تانىستىرىلدى. جوبانى Tech Garden دەربەس كلاستەرلىك قورىنىڭ پورتفەلدىك ستارتاپى «قز اۆتونومدى تەحنولوگيالار» كومپانياسى Startup Kazakhstan اكسەلەراتسياسىنا قاتىسۋ بارىسىندا جۇزەگە اسىردى. اتالعان باعدارلاماعا يندۋستريا جانە ينفراقۇرىلىمدىق دامۋ مينيسترلىگى قولداۋ كورسەتىپ وتىر.
تۇساۋكەسەر بارىسىندا ەلەكتروندى تازالاعىشتاردىڭ قالاي جۇمىس ىستەيتىنى كورسەتىلدى. تولىعىمەن اۆتونومدى قۇرىلعى ەدەندى جۋ بارىسىندا ادامداردى, قابىرعالاردى جانە باسقا دا كەدەرگىلەردى اينالىپ ءوتىپ, كەڭىستىكتە ادامنىڭ ارالاسۋىنسىز قوزعالادى. سونىمەن قاتار روبوت ۇنەمدەپ, قايتا پايدالانۋ ماقساتىمەن سۋدى ىشكى قورابىندا تازالايدى. جاساندى ينتەللەكت ەلەمەنتتەرى ەنگىزىلگەندىكتەن بىرنەشە روبوت ءبىر بولمەدە ءبىر-بىرىنە كەدەرگى كەلتىرمەي قوزعالادى. ءتىپتى روبوت-جۇمىسكەرلەر قاجەت بولعان جاعدايدا, باتارەيا مەن سۋدى اۋىستىرۋ ماقساتىندا وزدىگىنەن بازاعا اتتانادى.
– Tech Garden ۇسىنعان ءۇش ايلىق اكسەلەراتسياعا قاتىسۋ ارقىلى قاجەتتى ءبىلىم الىپ, روبوتتى وندىرىستىك ماقساتتا قۇراستىرۋعا دايىن دەڭگەيگە جەتكىزدىك. سودان سوڭ قازاقستاندا العاشقى ءىرى تاپسىرىس بەرۋشى كومپانيانى تاپتىق. ءبىرىنشى روبوتتار استاناداعى نۇرسۇلتان نازارباەۆ حالىقارالىق اۋەجايىندا ىسكە قوسىلدى, – دەيدى جوبا اۆتورى نيكولاي پوتاپوۆ.
قازىرگى تاڭدا اتالعان ستارتاپ قازاقستاندىق كومپانيالارعا 100 روبوتتى جەتكىزۋگە كەلىسىم جاساسقان. سونداي-اق رەسەيلىك كومپانيالارعا 500 روبوتتى جەتكىزۋ تۋرالى كەلىسسوزدەر جۇرگىزۋدە. ءبىر روبوتتىڭ قۇنى – 2,5 ملن تەڭگە. بۇل روبوتتىڭ تەحنولوگيالىق سيپاتتاماسى قولدانىستاعى انالوگتارىنان جوعارى بولعانىمەن, باعاسى بىرنەشە ەسە ارزان. قازىر ەلىمىزدە وسى روبوتتاردىڭ ونەركاسىپتىك ءوندىرىسىن قۇرۋ ماسەلەلەرى قارالۋدا.
«ەلباسى قويعان تاپسىرمالاردى ورىنداۋ اياسىندا Startup Kazakhstan باعدارلاماسىنىڭ ناتيجەسىن كورىپ وتىرمىز. ماقسات – وتاندىق ستارتاپتاردى قولداۋ جانە شەتەلدىك ستارتاپتاردى تارتۋ ارقىلى قازاقستاندا جوعارى تەحنولوگيالىق كومپانيالار جيىنتىعىن قۇرۋ. ۇكىمەتتىڭ قولداۋىمەن Tech Garden كلاستەرىنىڭ اينالاسىندا تولىق ەكوجۇيە قۇرىلىپ, تمد ەلدەرىنەن ستارتاپتاردىڭ ءتيىمدى اعىنى ورناتىلدى. بۇگىن Startup Kazakhstan باعدارلاماسىنىڭ ناتيجەسىندە ياكۋتتىق ستارتاپتىڭ جوعارى تەحنولوگيالى قازاقستاندىق كومپانياعا اينالۋىن كوردىڭىزدەر. اتالعان كومپانيا قازاقستاندا تىركەلىپ, سالىق تولەپ, ەل ەكونوميكاسىنا قاتىسۋدا», دەيدى Tech Garden دەربەس كلاستەرلىك قورىنىڭ باس ديرەكتورى سانجار كەتتەبەكوۆ.
«ەگەمەن-اقپارات»