بۇل تۋرالى وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا وبلىستىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى قايرات وتاروۆ مالىمدەدى.
ونىڭ ايتۋىنشا, «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسىن جۇزەگە اسىرۋ اياسىندا ءوزىن-ءوزى جۇمىسپەن قامتىعاندار, جۇمىسسىزدار جانە از قامتىلعان ازاماتتار قاتارىنان 49761 ادام حالىقتىڭ جۇمىسپەن قامتىلۋىنا جاردەمدەسۋدىڭ بەلسەندى شارالارىمەن قامتىلىپ, 6,8 ملرد.تەڭگە يگەرىلگەن.
«كاسىپتىك جانە تەحنيكالىق دايىندىققا 1085 اقتوبەلىك جىبەرىلدى, 819,3 ملن.تەڭگە ءبولىنىپ, يگەرىلدى, قىسقا مەرزىمدى كاسىپتىك وقىتۋدان 2676 ادام ءوتىپ, ولاردىڭ 2034-ءى جۇمىسقا ورنالاستى. "باستاۋ بيزنەس" جوباسى اياسىندا 2231 ادام كاسىپكەرلىك نەگىزدەرىنە وقىتىلىپ, ولاردىڭ 581-ءى ءوز بيزنەس-جوبالارىن قورعادى, 516 ادامعا قارجى بەرىلدى. 997 ادام 4669,3 ملن. تەڭگە كولەمىندەگى شاعىن نەسيە الدى. ءوز بيزنەس-يدەيالارىن جۇزەگە اسىرۋ ماقساتىندا 117 ادامعا مەملەكەتتىك گرانتتار بەرىلدى. بوس جۇمىس ورىندارىنا 28 669 ادام جۇمىسقا ورنالاستىرىلدى, ونىڭ ىشىندە مەملەكەتتىك جانە ۇكىمەتتىك باعدارلامالار, وڭىرلەردى دامىتۋ باعدارلامالارى شەڭبەرىندە 2186 ادام جۇمىسپەن قامتىلدى», - دەدى باسقارما باسشىسى.
سونداي-اق, وبلىستىڭ 2024 تۇرعىنى الەۋمەتتىك جۇمىس ورىندارىنا جۇمىسقا ورنالاستى, 1301 ادام تۇراقتى جۇمىس ورىندارىنا كىردى, 2587 ادام «جاستار تاجىريبەسىنەن» ءوتۋ مۇمكىندىگىن پايدالاندى, ونىڭ ىشىندە تۇراقتى جۇمىس ورىندارىمەن 1256 ادام قامتاماسىز ەتىلدى. قوعامدىق جۇمىستارمەن 8849 ادام قامتىلدى, 15 ينفراقۇرىلىم جانە تۇرعىن ءۇي-كوممۋنالدىق شارۋاشىلىق نىساندارىن جوندەۋ جۇمىستارى اياقتالدى.
وسى باعدارلامانى ىسكە اسىرۋ شەڭبەرىندە 2019 جىلى 38 153 ادامدى جۇمىسپەن قامتۋدىڭ بەلسەندى شارالارىمەن قامتۋ جوسپارلانۋدا, ونىڭ ىشىندە كاسىپتىك جانە تەحنيكالىق وقىتۋعا 1085, قىسقا مەرزىمدى كاسىپتىك وقىتۋعا 2870 ادام جىبەرىلىپ وتىر. «باستاۋ بيزنەس» جوباسى بويىنشا كاسىپكەرلىك نەگىزىندە 1125 ادام وقىتىلاتىن بولسا, 1526 ادام الەۋمەتتىك جۇمىس ورىندارىنا جىبەرىلىپ, وقۋ ورنىن بىتىرگەن 2340 تۇلەكتى «جاستار تاجىريبەسىنە» جىبەرۋ, قوعامدىق جۇمىستارمەن 5111 ادامدى قامتۋ جوسپارلانۋدا.