رەسپۋبليكالىق قۇسبەگىلەر بىرىنشىلىگى وسىمەن ءتورتىنشى جىل قاتارىنان بارقىتبەلدىڭ باۋرايىندا ءوتتى. بۇركىتشىلەر باسەكەسى ءۇرجار اۋدانىندا ەكى, اياگوز اۋدانىندا ءبىر مارتە ۇيىمداستىرىلسا, بيىل تۇڭعىش رەت تارباعاتاي اۋدانىندا جالاۋىن جەلبىرەتتى.
بابادان قالعان باعلان ونەرىمىزدى ۇلىقتاپ, وسى ءتورت چەمپيوناتتى جىل ارالاتپاي شىعىس توپىراعىندا وتكىزۋگە ۇيىتقى بولىپ جۇرگەن ءۇرجار اۋدارىنىڭ كوكوزەك اۋىلىنىڭ تۋماسى, اتبەگى, قۇسبەگى, «شىعىس-التاي» بۇركىتشىلەر فەدەراتسياسىنىڭ جەتەكشىسى تاتتىمبەت كاپ ۇلى ەكەندىگىن ايتۋ پارىز.
تارباعاتاي اۋدانىنىڭ ورتالىعى - اقسۋات اۋىلىندا شىمىلدىعى تۇرىلگەن بۇركىتشىلەردىڭ 13 چەمپيوناتىنا بيىل ەلىمىزدىڭ 12 وبلىسىنان يتەلگىسى بار, قارشىعاسى بار, قىرانى بار 40 قۇس قاتىسىپ, جارىستىڭ كورىگىن قىزدىردى. ءۇرجار اۋدانىنىڭ سەرى جىگىتتەرى سەگىز بۇركىت اكەلىپتى. وسى شارا بارىسىندا جەرگىلىكتى جۇرت شويتابان اتايتىن ۇرجارلىق اڭشى ەرزات بايقاداموۆ سەگىز بۇركىتتىڭ ءبىرىن, ياعني ءوز قىرانىن اقسۋاتتىق ازامات سايات سادۋانوۆقا سىيعا تارتىپ, مارتتىگىن تانىتتى. قۇسبەگىلەر سايىسىنىڭ باسى-قاسىندا جۇرگەن تارباعاتايلىق جىگىت تە قاراپ قالماي, ساياتشىلاردىڭ «تۇعىر جابار» داستۇرىمەن اتىمتاي جومارت ازاماتقا ات مىنگىزىپ, قۇرمەت كورسەتتى. «تارباعاتاي اۋدانىنا بۇركىت سىيلاپ جاتقانىمىز – وسى وڭىردە دە ساياتشىلىق ونەر قانات جايسا, ءىزىمىزدى جالعايتىن ىنىلەرىمىز كوبەيسە دەگەن ىزگى نيەت. ايتپەسە وزدەرىڭىز بىلەتىندەي, ءبىزدىڭ وبلىستا ءۇرجار اۋدانىنان باسقا اۋداندا ەشكىم بۇركىت ۇستامايدى», - دەيدى تاتتىمبەت كاپ ۇلى.
ەكى كۇنگە سوزىلعان چەمپيوناتتىڭ العاشقى كۇنىندە جۇرتشىلىق قولعا شاقىرۋ, شىرعاعا ءتۇسىرۋ سايىستارىن تاماشالاسا, ەكىنشى كۇنى جارتىلاي فينالعا جولداما العان 13 قۇستىڭ ونەرىن قىزىقتادى. 13-ءتىڭ ىشىنەن فينالعا ءتورت قىران سۋىرىلىپ شىعىپ, شاپقان اتتىڭ سوڭىندا سۇيرەتىلىپ بارا جاتقان تۇلكىنىڭ ت ۇلىبىنا 20 سەكۋندتتا تۇسكەن استانالىق سەرىكبەك كۇنتۋعاننىڭ «العىر» اتتى بۇركىتى بايقاۋ جەڭىمپازى اتاندى. ۇرجارلىق تاتتىمبەت كاپ ۇلى مەن كوكشەتاۋلىق قۇسبەگى تاستانبەك بەرگەنباي قۇستارىن قارساققا سالدى. بۇل سىندا تارباعاتاي تاۋىنىڭ شىڭىندا شىڭدالعان تاتتىمبەتتىڭ «اق پەرىسى» بابىندا ەكەندىگىن بايقاتتى.
بۇركىتشىلەردىڭ ءداستۇرلى چەمپيوناتىنىڭ تارباعاتاي اۋدانىندا وتۋىنە «شىعىس-التاي» بۇركىتشىلەر فەدەراتسياسىمەن قاتار وسى ءوڭىردىڭ تۋماسى, مەتسەنات بادەلحان كامەلحان ۇلى مەن استاناداعى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆتىڭ مۇرىندىق بولعانىن ايتا كەتكەن ورىندى. جەڭىمپازداردى ماراپاتتاۋ ساتىندە وسى ازاماتتاردىڭ سىي-سياپاتى ارنايى تاپسىرىلدى.
«قۇسبەگىلەردىڭ چەمپيوناتى تارباعاتاي اۋدانىندا العاش رەت ۇيىمداستىرىلدى. وسى رەتتە تاتتىمبەت, ەرزات باستاعان, سايات قوستاعان ازاماتتارعا العىسىمىز زور. ۇلتتىق داستۇرىمىزگە جۇرتتىڭ قىزىعۋشىلىعى, ىنتا-ىقىلاسىنىڭ زور ەكەنىن بايقادىق. سوندىقتان الداعى جىلى وسى چەمپيوناتتى حالىقارالىق دەڭگەيدە, ياعني ىرعىزباي دوسحانا ۇلى اتىنداعى حالىقارالىق بۇركىتشىلەر سايىسى دەپ وتكىزسەك پە دەگەن ويىمىز بار. سونىمەن قاتار اۋدانداعى ونەر مەكتەبى ىشىنەن بۇركىتشىلەر سىنىبىن اشىپ, ارنايى شتات ءبولۋدى جوسپارلاپ وتىرمىز», - دەيدى تارباعاتاي اۋدانىنىڭ اكىمى دىلدابەك ورازباەۆ.
ازامات قاسىم,
«Egemen Qazaqstan»
شىعىس قازاقستان وبلىسى, تارباعاتاي اۋدانى, اقسۋات اۋىلى