توتەنشە جاعدايلار دەپارتامەنتىندە جەدەل شتاب قۇرىلدى

استانا قالاسى توتەنشە جاعدايلار دەپارتامەنتى اۋا رايىنىڭ قولايسىزدىعىنا بايلانىستى 5-7 اقپان ارالىعىندا جەدەل شتاب ۇيىمداستىردى.

5 اقپاندا «112» قىزمەتىنە ءارتۇرلى سيپاتتاعى 6638 قوڭىراۋ (جولداردىڭ جابىلۋى – 2211, ساباقتىڭ بولمايتىنى تۋرالى - 2307) كەلىپ تۇسكەن. 5 اقپاندا ساعات 20:00-دەن باستاپ دەپارتامەنت بولىمشەلەرى «استانا-قورعالجىڭ», «استانا-قوسشى», «استانا-كوكشەتاۋ», «استانا-اتباسار», «استانا-پاۆلودار» جانە «استانا-قاراعاندى» باعىتتارى بويىنشا جوعارى ءوتىمدى اۆتوموبيلدەرمەن (كۋنگ) پاترۋلدەۋ جۇمىستارىن جۇرگىزدى, 60 ادام (ونىڭ ىشىندە 9 بالا) 19 بىرلىك تەحنيكا قار قۇرساۋىنان شىعارىلدى.

 «01 ساعات 10 مينۋتتا قوياندى كەنتىنىڭ اۋدانىندا ىشىندە جۇكتى ايەل بار اۆتوكولىكتىڭ قار قۇرساۋىندا قالىپ قويعاندىعى تۋرالى حابارلاما كەلىپ ءتۇستى. وقيعا ورنىنا دەپارتامەنتتىڭ بولىمشەسى جىبەرىلدى, بوساناتىن ايەلدى №1 پەريناتالدىق ورتالىققا جەتكىزدى جانە اكۋشەرلەرگە تاپسىردى», دەپ حابارلادى توتەنشە جاعدايلار دەپارتامەنتى.

«استانا-پاۆلودار» تاسجولىنان باسقا بارلىق باعىتتار بويىنشا جولدار اشىق, بىراق جۇك جانە قوعامدىق كولىك ءۇشىن شەكتەۋلەر بار.

استانا قالاسى توتەنشە جاعدايلار دەپارتامەنتى قالا تۇرعىندارى مەن قوناقتارىن قالا سىرتىنا جول جۇرمەۋگە جانە اۋا رايى كۇرت ناشارلاعان جاعدايدا مۇمكىندىگىنشە ۇيدەن شىقپاۋعا شاقىرادى.قازىرگى تاڭدا قالاداعى جاعداي تۇراقتى جانە باقىلاۋدا.

ەلوردا تۇرعىندارى مەن قوناقتارىنىڭ نازارىنا:

- مۇقيات بولىڭىز, اۋا رايىنىڭ وزگەرۋى تۋرالى اقپاراتتى جانە ەنگىزىلگەن شەكتەۋلەردى ءجىتى قاداعالاڭىز;

- كوشەدە باعانداردان, اعاشتاردان, جارنامالىق تاقتالاردان, ەجج جانە سىمداردان الىس جۇرۋگە تىرىسىڭىز;

- جەكە اۆتوكولىگىڭىزدى اعاشتار مەن ەسكى قۇرىلىستاردان الىس قويىڭىز;

- قۇرىلىس وبەكتىلەرى حالىقتى جانە اۋماقتى قولايسىز اۋا رايى جاعدايلارىنىڭ اسەرىنەن قورعاۋ جونىندە قوسىمشا شارالار قابىلداسىن; مۇمكىندىگىنشە قۇرىلىس وبەكتىلەرىندەگى قۇرىلىس-مونتاج جۇمىستارىنىڭ قىزمەتىن شەكتەسىن.

توتەنشە جاعداي تۋىنداعان كەزدە «112» نومىرىنە قوڭىراۋ شالىڭىز!