بۇگىن 4-6 اقپان كۇندەرىنە بەلگىلەنگەن الماتى قالاسىنداعى «زاماناۋي مەديتسينالىق ءبىلىم بەرۋ سالاسىنداعى ساپا, ۇزدىكسىز جەتىلدىرۋ جانە بەنچماركەتينگ» حالىقارالىق سەمينارى اياقتالادى.
بۇگىنگى تاڭدا بولاشاق دارىگەرلەردى وقىتۋدى جاڭا ساتىعا كوتەرۋ – زامان تالابىنا اينالدى. سوندىقتان ونىڭ بىردەن ءبىر ءتاسىلى – ەمحانا, اۋرۋحانالارمەن بىرىگىپ جۇمىس ىستەۋ.
– سەميناردىڭ باستى ماقساتى – ءححى عاسىردىڭ جاڭا سۇرانىسىنا ساي, ەلىمىزدە مەديتسينالىق ءبىلىم بەرۋ ءىسىن دۇرىس جولعا قويۋ. سونداي-اق دارىگەلەردىڭ جاڭا تەحنولوگيانى يگەرۋى, ەمدەلۋشىلەرمەن جۇمىس ىستەۋى, جاڭا تەحنولوگيالار مەن ادىستەردى قولدانۋى جانە ولاردان قانداي ناتيجە كۇتەتىنىمىزدى دە تالقىلاپ الايىق دەدىك. وسى جولدا ۋنيۆەرسيتەتتەر مەن اۋرۋحانالاردىڭ ينتەگراتسياسىن كۇشەيتۋىمىز كەرەك, سودان سوڭ ەلىمىزدىڭ ۇزدىك عىلىمي ينستيتۋتتارى بازاسىندا ۋنيۆەرسيتەتتىك كلينيكالار قۇرۋعا كوشەمىز. وسى جولدا ءبىز دارىگەرلەر دايىنداۋدى بۇرىنعى ادىستەن قازىرگى زاماناۋي ستاندارتقا كوشىرۋ ءۇشىن مەديتسيناسى جاقسى دامىعان مالايزيا, ليتۆا ەلدەرىن تاڭدادىق. بۇل ەلدەر بۇرىننان-اق ءبىزدىڭ ستراتەگيالىق ارىپتەستەرىمىز بولىپ تابىلادى. الايدا ەندى ءبىز ولارمەن بىرىگە وتىرىپ بولاشاق مەديتسينا ماماندارىن دايارلايتىن ورتاق باعدارلاما جاساۋدى جوسپارلاپ وتىرمىز. سول بويىنشا الداعى 2-3 جىلدا مەديتسينا ماماندارىن 7-9 جىل ەمەس, 6 جىل وقىتاتىن جۇيەگە كوشكىمىز كەلىپ وتىر, – دەدى قر دەنساۋلىق ساقتاۋ ۆيتسە-ءمينيسترى ولجاس ابىشەۆ.
– بەنچماركينگ دەگەنىمىز – مىنە, وسى. ياعني, ءبىر ەمەس, بىرنەشە ەلدىڭ تاجىريبەسىن سالىستىرا وتىرىپ, جاقسىسىن, قولايلىسىن الۋ. «مىسالى ءبىز فرانتسيا مەديتسيناسىنىڭ تاجىريبەسىن قازاقستانعا ەنگىزە المايمىز. سەبەبى فرانتسيانىڭ كولەمى شاعىن, ءبىز ودان ءتورت-بەس ەسە كەلەمىز. سوعان بايلانىستى بىزدە دارىگەرلەر باسقاشا دايارلانۋى كەرەك. فەلدشەرلىك اشىق پۋنكتتەر دەسەك, ولار اۆستراليا, كانادا سياقتى ۇلكەن ەلدەرگە ءتان نارسە. شاعىن ەلدەرگە ونىڭ قاجەت جوق. سوندىقتان ءبىز كوپتەگەن ەلدەردىڭ تەك جاقسى دەگەن تاجىريبەلەرىن الا وتىرىپ, بەنچماركينگ ارقىلى ەرەكشە ءوز مودەلىمىزدى قۇرعىمىز كەلەدى» – دەدى ۆيتسە-مينيستر جۋرناليستەرگە بەرگەن ارنايى سۇحباتىندا.
ءۇش كۇنگە سوزىلاتىن سەمينار-ترەنينگ اياسىندا قازىرگى زامانعى ءبىلىم بەرۋدىڭ وزەكتى ماسەلەلەرى – ساپا فيلوسوفياسى, وقىتۋشىنىڭ ءرولى مەن قۇزىرەتتىلىگى, باعالاۋ ادىستەرى جانە ت.ب. قاراستىرىلدى. سونىمەن قاتار, سەمينار سپيكەرلەرى, پروفەسسور Vishna Devi Nadaraja جانە دوكتور Azizi Ayob فوكۋس-توپتاردا جۇمىس ىستەۋ كەزىندە مەديتسينالىق جوعارى وقۋ ورىندارىندا جەكە كەڭەستەر مەن كەزدەسۋلەر بارىسىندا ساپانى قولداۋ ماسەلەلەرىندە ادىستەمەلىك جانە ءىس جۇزىندەگى تاجىريبەلىك كومەك كورسەتتى.
حالىقارالىق جيىندى ۇيىمداستىرۋعا قر دەنساۋلىق ساقتاۋ مينيسترلىگىنىڭ قولداۋىمەن «قدسجم» قازاقستاندىق مەديتسينا ۋنيۆەرسيتەتى ۇيىتقى بولدى.
ايناش ەسالي,
«Egemen Qazaqstan»
الماتى