قازاقستاندىق كارديوحيرۋرگتەر كومانداسى چەحيا, يزرايل, يتاليا جانە اقش سەرىكتەستەرىمەن بىرلەسىپ سىمسىز قوسالقى قاناينالىم قۇرىلعىسىن يمپلانتاتسيالاۋ بويىنشا بىرەگەي وپەراتسيانى ءساتتى وتكىزدى. بۇل تۋرالى كازتاگ حابارلادى.
جۇرەكتىڭ سول جاق قارىنشاسىنىڭ كومەكشى قۇرىلعىسى ادامعا ەركىن قوزعالۋعا مۇمكىندىك بەرەدى. سەبەبى سىرتقا ەشقانداي كابەلدەر شىعىپ تۇرمايدى. بۇل بىرقاتار اسقىنۋدى بولدىرمايدى جانە ءومىر ءسۇرۋ ساپاسىن ەداۋىر جاقسارتادى. ايتا كەتۋ كەرەك, بۇل جاعداي كارديوحيرۋرگيالىق تاجىريبەدە العاش رەت بولىپ, الەمدەگى بىرەگەي جانە جالعىز وقيعا بولدى», - دەدى «ۇلتتىق عىلىمي كارديوحيرۋرگيا ورتالىعى» اق باسقارما توراعاسى يۋري پيا.
تولىعىمەن يمپلانتاتسيالاناتىن قۇرىلعى (FIVAD) - پاتسيەنتتەرگە سىرتقى قۋات كوزىنە تىكەلەي قوسىلماعان, ءومىر سۇرۋگە مۇمكىندىك بەرەتىن الەمدەگى العاشقى كومەكشى قۇرىلعى. يننوۆاتسيالىق قۇرىلعى يزرايلدە جاسالعان. ونىڭ قىزمەتى كادىمگىدەي كارديوستيمۋلياتورمەن بىردەي. بىراق ەشقانداي سىمدارى جوق. سونىڭ ارقاسىندا ەركىن قوزعالىپ, سالاماتتى ءومىر سالتىن ۇستانۋعا تولىق مۇمكىندىك بار.
«FIVAD جۇرەك فۋنكتسياسىنىڭ جەتىسپەۋشىلىگىنىڭ تەرمينالدىق ساتىسىن ەمدەۋدە پاراديگما مەن تاسىلدەردى وزگەرتۋدە ۇلكەن پەرسپەكتيۆاعا يە. ءبىز بۇل سەرپىندى تەحنولوگيالىق جەتىستىكتى ۇسىنۋعا قۋانىشتىمىز, ول ەمدەلۋشىلەرگە حيرۋرگيالىق ارالاسۋدان كەيىن تولىققاندى جانە ساپالى ءومىر سۇرۋگە مۇمكىندىك بەرەدى», - دەدى يۋري ۆلاديميروۆيچ.
ايتا كەتسەك, Leviticus Cardio Ltd كومپانياسى FIVAD ءۇشىن سىمسىز قورەكتەنۋ تەحنولوگياسىنىڭ ونەرتاپقىشى, ونىڭ كلينيكالىق قولدانىلۋىن كەڭەيتۋدى, تاۋەكەلدەردى ازايتۋدى جانە سوڭعى ساتىدا جۇرەك جەتىسپەۋشىلىگىن ەمدەۋ ساپاسىن ارتتىرۋدى جوسپارلاپ وتىر. سونىمەن قاتار, بۇل جاڭاشىلدىق تەراپيا اۋقىمىن كەڭەيتىپ, ءوز كەزەگىندە دونورلاردىڭ جەتىسپەۋشىلىگىمەن شەكتەلگەن جۇرەك ترانسپلانتاتسياسىنا بالامالى تەحنولوگيالىق بالاما ۇسىنا الادى.