بۇگىن اقوردادا ەلباسى نۇرسۇلتان نازارباەۆ بىرقاتار شەتەل ەلشىسىنەن سەنىم گراموتاسىن قابىلدادى. بۇل تۋرالى قازاقپارات حاا حابارلادى.
اتاپ ايتقاندا, مەملەكەت باسشىسىنا ۆەتنام سوتسياليستىك رەسپۋبليكاسىنىڭ ەلشىسى نگۋەن تحي حونگ وان, حورۆاتيا رەسپۋبليكاسىنىڭ ەلشىسى رەفيك شابانوۆيچ, جاپونيا ەلشىسى تاتسۋحيكو كاساي, چەح رەسپۋبليكاسىنىڭ ەلشىسى رۋدولف گيكل, تاجىكستان رەسپۋبليكاسىنىڭ ەلشىسى حايرۋللو يبودزودا سەنىم گراموتاسىن تابىستادى.
«بۇگىن سەنىم گراموتالارىن تاپسىرۋعا ارنالعان سالتاناتتى راسىمگە قوش كەلدىڭىزدەر. بارشاڭىزدى قازاقستانداعى ديپلوماتيالىق قىزمەتتەرىڭىزدىڭ باستالۋىمەن شىن جۇرەگىممەن قۇتتىقتايمىن. سىزدەردىڭ قىزمەتتەرىڭىز قازاقستانداعى ماڭىزدى رەفورمالاردىڭ جۇزەگە اسىرىلۋ كەزەڭىمەن تۇسپا-تۇس كەلىپ وتىر. ءبىزدىڭ 2050 جىلعا دەيىنگى باعدارلامامىزدى ورىنداۋ ءۇشىن جاپپاي جۇمىس ىستەپ جاتىرمىز. ءبىز تاۋەلسىز ەل بولدىق. ەندى ءبىزدىڭ ماقساتىمىز - الەمدەگى وزىق دامىعان 30 ەلدىڭ قاتارىنا قوسىلۋ» دەدى ەلشىلەرگە ءسوز ارناعان قازاقستان پرەزيدەنتى.
مەملەكەت باسشىسى قازاقستاننىڭ كەلەشەگى زاماناۋي تەحنولوگيانى جەتە مەڭگەرگەن وسكەلەڭ ۇرپاقتىڭ قولىندا ەكەندىگىن باسا ايتتى. ء«بىز ساۋاتتى, بۇگىنگى زامانعا ساي ۇرپاق تاربيەلەدىك. وسىنداي جاس بۋىن وكىلدەرىن قولداۋ ماقساتىمەن بيىلعى جىل قازاقستاندا جاستار جىلى دەپ جاريالاندى. بۇل باستامانىڭ اياسىندا ولاردى ساپالى بىلىممەن, جۇمىسپەن, باسپانامەن قامتاماسىز ەتۋ شارالارى قولعا الىندى. سونىمەن قاتار جاستاردىڭ باسەكەگە قابىلەتتى ازامات بولىپ قالىپتاسۋىنا جول اشامىز» دەدى ەلباسى.
قر پرەزيدەنتى حالىقتىڭ الەۋمەتتىك جاعدايىن جاقسارتىپ, كاسىپكەرلىكتى دامىتۋ ءۇشىن بىرقاتار مەملەكەتتىك باعدارلامالار قابىلدانعانىن اتاپ ءوتتى. سونىڭ ناتيجەسىندە Doing Business-ءتىڭ رەيتينگىندە قازاقستان 190 ەلدىڭ ىشىندە 28 ورىنعا يە بولدى.
«ەل ەكونوميكاسىن ودان ارى دامىتۋ ءۇشىن شەتەل ينۆەستيتسياسىن تارتۋ ماڭىزدى مىندەت سانالادى. تاۋەلسىزدىك جىلدارىنىڭ ىشىندە ءبىزدىڭ جۇرگىزگەن ساياساتىمىزدىڭ ارقاسىندا ەلىمىزگە جۇزدەگەن ملرد دوللار تىكەلەي ينۆەستيتسيا كەلدى. ول ءبىزدىڭ ەكونوميكامىزدى كوتەرۋگە ءوزىنىڭ سەپتىگىن تيگىزدى. سىرتقى ىستەر مينيسترلىگىنىڭ قۇزىرەتى قازىرگى ۋاقىتتا كەڭەيىپ, وعان شەتەلدىك ينۆەستيتسيا تارتۋ, جاڭا ەكسپورتتىق باعىتتاردى ايقىنداۋ ماسەلەلەرى جۇكتەلدى. سىزدەردى قازاقستانداعى ارىپتەستەرىڭىزبەن بىرلەسىپ, اتالعان باعىتتاردا ءوزارا ءىس-قيمىلدى جانداندىرۋعا شاقىرامىن» دەدى نۇرسۇلتان نازارباەۆ.