استانادا شايبالى حوككەيدەن وتكەن ءىىى قىسقى جاستار ويىندارىندا قاراعاندى وبلىسىنىڭ قۇراما كومانداسى استانا قالاسى مەن شىعىس قازاقستان وبلىسىنىڭ ۇجىمدارىن العا جىبەرىپ, جۇلدەلى ءۇشىنشى ورىندى قاناعات ەتتى.
«بارىس ارەنا» سپورت كەشەنىنىڭ مۇز ايدىنىندا وتكەن تۋرنيردە 2004-2005 جىلدارى تۋعان جاسوسپىرىمدەر باق سىنادى. جارىس بارىسىندا كوش باسىنداعى كوماندالار بىردەي ۇپاي جيناعان بولاتىن. بىراق جەڭىمپاز بەن جۇلدەگەرلەر تاعدىرىن كوماندالار ۇلەسىندەگى شايبا ايىرماشىلىعى شەشتى. ناتيجەسىندە, رەسپۋبليكالىق سايىستىڭ ءۇش كەزەڭىنىڭ قورىتىندىسى بويىنشا قاراعاندىلىق ۇجىم قولا جۇلدەگە يە بولدى.
– بالعىن حوككەيشىلەرىمىزدىڭ جەڭىسكە دەگەن جىگەرىن اتاپ ءوتۋ كەرەك. ءبىز جوعارى باسەكەلەستىك جاعدايىندا كوشباسشىلار ۇشتىگىنە ىلىگۋدىڭ وڭايعا سوقپاسىن جاقسى بىلدىك. دەگەنمەن, جىگىتتەر جارادى! سوڭىنا دەيىن بەرىسپەي, ناتيجەسىندە قولا جۇلدەگەر اتاندى. بالالاردىڭ بارلىعى ءبىزدىڭ مەكتەپتىڭ تاربيەلەنۋشىلەرى. تاماشا تولقىن ءوسىپ كەلەدى, – دەيدى شايبالى حوككەيدەن قاراعاندى وبلىستىق بالالار-جاسوسپىرىمدەر وليمپيالىق رەزەرۆ مەكتەبىنىڭ باسشىسى سەرگەي بۋنياكين.
الدا – ءتورتىنشى, شەشۋشى كەزەڭ.
قايرات ءابىلدا,
«Egemen Qazaqstan»
قاراعاندى