كەشە عانا بارلىق قازاقستاندىقتاردى جەڭىسىمەن قۋانتقان بوكسشى جانىبەك ءالىمحان ۇلى (5-0, 2 كو) الداعى ۋاقىتتا WBA (Super)/WBC بويىنشا الەم چەمپيونى ساۋل «كانەلو» الۆارەسپەن (51-1-2, 35 كو) جەكپە-جەك وتكىزۋگە نيەتتى ەكەنىن ايتتى. بۇل تۋرالى Sports.kz. حابارلادى.
«كانەلو» - مەنىڭ سالماعىمداعى چەمپيون. مەن الەم چەمپيوندارىمەن بوكستاسقىم كەلەدى. سوندىقتان «كانەلومەن» جەكپە-جەككە شىعۋعا دايىنمىن. GGG ودان جەڭىلىپ قالدى, ال مەن گەنناديدىڭ جەرلەسىمىن, سول ءۇشىن «كانەلونى» جەڭىپ, تيتۋلدارىن قازاقستانعا قايتارعىم كەلەدى», - دەدى جانىبەك Fino Boxing ارناسىنا بەرگەن سۇحباتىندا.
ايتا كەتەيىك, كەشە اقش-تىڭ فريسكو قالاسىندا قازاقستاندىق بوكسشى جانىبەك ءالىمحان ۇلىنىڭ بەسىنشى جەكپە-جەگى جەڭىسپەن اياقتالعانىن جازعان ەدىك. 25 جاسار قازاقستاندىقتىڭ بۇل جولعى قارسىلاسى امەريكالىق ستيۆەن مارتينەس – «The Hitman» بولدى. كەزەكتى كەزدەسۋدە جانىبەك ناعىز «قازاقشا» ءستيلدى كورسەتىپ كەتتى. جەكپە-جەك 8 راۋندقا ەسەپتەلگەن ەدى, بىراق 5 راۋندتى بوكسشىمىز تەحنيكالىق نوكاۋتپەن اياقتادى.