وسكەمەندە اياقتالعان ەل بىرىنشىلىگىنىڭ قورىتىندىسى بويىنشا بيىل كوكتەمدە كاتاردىڭ استاناسى – دوحادا وتەتىن ازيا چەمپيوناتىنا قاتىساتىن جەڭىل اتلەتتەر ىرىكتەلىندى.
جاڭا عاسىر تابالدىرىقتان اتتاعان كەزدەن بەرگى ناتيجەلەرگە زەر سالساق, قازاقستان قۇراماسى سارى قۇرلىقتىڭ باستى دوداسىنىڭ جالپى كوماندالىق ەسەبىندە نەبارى ەكى رەت ۇزدىك ۇشتىكتىڭ قاتارىنا كورىنگەن ەكەن. 2002 جىلى شري-لانكادا 6 التىن, 2 كۇمىس جانە 4 قولا مەدالدى ەنشىلەسەك, 2017 جىلى ءۇندىستاندا 4 التىن, 2 كۇمىس جانە 2 قولا جۇلدەنى قورجىنعا سالدىق. سوڭعى جارىستا وتانداستارىمىز ءۇندىستان (12+5+12) مەن قىتايدان (8+9+4) عانا قالىپ قويدىق. ءۇندى ەلىندە ءبىزدىڭ جەڭىل اتلەتتەر اراسىنان 100 جانە 200 مەترگە جۇگىرگەن جەلاياق ۆيكتوريا زيابكينا الدىنا جان سالماسا, ءۇش قارعىپ سەكىرۋدە ماريا وۆچينيكوۆا وزدى. سونداي-اق, تاعى ءبىر باس جۇلدەنى 4ح100 مەترلىك ەستافەتالىق سايىستا ولجالادىق.
دوحاداعى دودادا جەرلەستەرىمىز ۇزدىك ۇشتىكتىڭ قاتارىنان كورىنۋدى كوزدەۋدە. وسى جارىستا باستى ءۇمىت ولگا رىپاكوۆا مەن يرينا ەكتوۆا ء(ۇش قارعىپ سەكىرۋ), ولگا سافرونوۆا (100 جانە 200 مەترگە جۇگىرۋ), مارگاريتا مۇقاشەۆا (800 مەترگە جۇگىرۋ) جانە ەلينا ميحينا (400 مەترگە جۇگىرۋ) سىندى سپورتشىلارعا ارتىلۋدا.
عالىم سۇلەيمەن
«Egemen Qazaqstan»