بۇل تۋرالى وبلىس اكىمى اپپارات ماجىلىسىندە ەسكەرتتى. بۇگىنگە دەيىن «7-20-25» باعدارلاماسى بويىنشا بانكتەرگە 1 ملرد. 407 ملن تەڭگەنى قۇرايتىن 206 ءوتىنىش تۇسكەن, سونىڭ 119-ى قاناعاتتاندىرىلدى.
وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى نۇرلان قاتاربەكوۆتىڭ ايتۋىنشا, وبلىستا وسى باعدارلامامەن جۇمىس ىستەۋگە ەكىنشى دەڭگەيلى 6 بانك – «بانك تسەنتركرەديت», «قازاقستان حالىق بانكى», «اتف بانك», «Forte بانك», «تسەسنا بانك», «سبەربانك» اق كىرىستى.
«وتكەن جىلدىڭ اياعىنا قاراي بانكتەرگە 352 بيۋدجەتتىك پاتەرلەر بەرىلگەن بولاتىن. ونىڭ ىشىندە 118 پاتەردىڭ 103-ءىن «بايتەرەك دەۆەلوپمەنت» اق قوعامى وزدەرى ساتتى. ءۇش پاتەردى «7-20-25» باعدارلاماسىنا بەردى, 12 پاتەر ءالى ساتىلعان جوق. قوستاناي قالاسىنىڭ اكىمياتى بەرگەن 99 پاتەردىڭ 25-ىنە ساتىپ الۋ-ساتۋ كەلىسىم شارتى راسىمدەلدى, قوسىمشا 60 قۇجات ازاماتتاردىڭ تولەم قابىلەتىن انىقتاۋعا جىبەرىلدى. تۇرعىندار تاراپىنان پاتەرگە سۇرانىس بار. ال قوستاناي اۋدانىندا باعدارلاما برويىنشا 135 پاتەر ساتىلدى, ونىڭ ىشىندە 29-ىنا سۇرانىس «Fortebank» ارقىلى قابىلداندى» - دەدى نۇرلان قاتاربەكوۆ.
دەگەنمەن وبلىس اكىمى ارحيمەد مۇحامبەتوۆ ەكىنشى دەڭگەيلى بانكتەر تارانىنان تۇرعىن ءۇي باعدارلاماسىنا مۇددەلىلىكتىڭ ماردىمسىز ەكەنىن ايتتى.
«ەكىنشى دەڭگەيلى بانكتەردىڭ بارلىعى بىردەي تۇرعىن ءۇي باعدارلاماسىنا بەلسەندى,ساپالى قاتىسىپ وتىرعان جوق. مەنىڭ تۇرعىندارمەن كەزدەسۋلەرىمدە بانكتەردىڭ ولاردى قۇجاتتارىن كورسەتۋدە ءارۋ-سارساڭعا سالاتىنى كوپ ايتىلادى. بانك مەنەدجەرلەرى ۋاقىتىلى كەڭەستەر بەرمەيدى. ادامداردىڭ دا ۋاقىتى از ەكەنىن ولار ويلاۋى ءتيىس, ويتكەنى جۇمىس كۇندەرى ولار جۇمىستا, دەمالىس كۇندەرى بانكتەر جۇمىس ىستەمەيدى. بانكتەر قىزىعۋشىلىق, مۇددەلىلىك تانىتپايدى. جەرگىلىكتى اكىمياتتار ۇيلەردى سالىپ جاتىر, دەر ۋاقىتىندا تاپسىرادى, بىراق ءارى قاراي جۇمىس جۇرمەيدى. بانك فيليالدارى ۇساق-تۇيەك ءۇشىن باس باسقارمالارىمەن ۇزاقتى كۇن كەڭەسەدى. جەرگىلىكتى جەردە ولار ىسكە جاۋاپكەرشىلىك الۋىنا بولادى عوي؟ باعدارلامامەن ۇيلەردى الەۋمەتتىك از قورعالعان وتباسىلار, ازاماتتار الادى. سوندىقتان جەرگىلىكتى فيليالدارىنا بانكتەر قانداي دا ءبىر وكىلەتتىكتەر بەرۋىنە بولماي ما؟» - دەدى ارحيمەد بەگەجان ۇلى.
سونىمەن قاتار, ءوڭىر باسشىسى تۇرعىن ءۇي باعدارلاماسىنىڭ مەحانيزمى تۋرالى تۇرعىنداردىڭ جەتكىلىكتى اقپاراتتاندىرىلماعانىن دا ايتتى. اسىرەسە, اۋىلداعى اعايىنداردىڭ بۇل تۋرالى بىلەتىنى تىم از. ول اۋىلداعىلار دا باعدارلامانىڭ بەلسەندى قاتىسۋشىسى بولۋى مۇمكىن. ولار دا قالادان ءۇي العىسى كەلەتىنى, زەينەت جاسىندا قالادا تۇرعىسى كەلەتىنىن ايتتى.
2019 جىلى قوستانايدا «7-20-25» باعدارلاماسى بويىنشا پاتەرلەر بىلتىرعىدان دا كوپ ساتىلاتىن بولادى. مىسالى ءبىر «بك-ستروي» قۇرىلىس كومپانياسىنىڭ ءوزى جاڭا «يۋبيلەينىي»تۇرعىن اۋدانىندا 252 پاتەردى «7-20-25» باعدارلداماسىمەن ساتۋعا شىعاراتىن بولادى. ەكىنشى دەڭگەيلى بانكتەر ارقىلى بىلتىرعىدان ساتىلماي قالعانى, بيىلعى تاپسىرىلاتىنى بار, بارلىعى 500-دەي پاتەر ساتىلادى.
ءنازيرا جارىمبەت,
«Egemen Qazaqstan»
قوستاناي