ەلباسىنىڭ بەس الەۋمەتتىك باستاماسى اياسىندا قوستاناي قالاسىندا ستۋدەنتتەرگە ارنالعان بەس جاتاقحانا سالىناتىن بولادى. وڭىردەگى ەڭ ءىرى ءبىلىم ورداسى ا.بايتۇرسىنوۆ اتىنداعى مەملەكەتتىك ۋنيۆەرسيتەتكە 9 قاباتتىق, 500 ورىندىق جاتاقحانا سالىنادى.
قۇرىلىس قۇنى ەكى جارىم ميللياردقا جۋىق تەڭگەنى قۇرايدى. ال ءو.سۇلتانعازين اتىنداعى مەملەكەتتىك پەداگوگيكا ۋنيۆەرسيتەتىندە دە 86 ورىندىق 3 قاباتتى جاتاقحانا بوي كوتەرمەك. ونىڭ قۇرىلىس-مونتاج جۇمىستارى 670 ميلليون تەڭگەدەن استام قارجىنى تالاپ ەتەدى. ەكى جاتاقحانانىڭ دا قۇجاتتارى دايىن. قۇرىلىستى قانداي كومپانيا جۇرگىزەتىنى قىس اياعىنا قاراي جاريالاناتىن كونكۋرسقا بايلانىستى بولادى.
مۇنىمەن قاتار, وبلىس ورتالىعىندا قۇرىلىس كوللەدجى, جوعارى پوليتەحنيكالىق كوللەدجى جانە مەديتسينا كوللەدجى ءۇشىن ءۇش جاتاقحانا سالىنباق. ولارعا دا بيۋدجەتتەن قوماقتى قارجى ءبولىندى. وبلىس اكىمى ارحيمەد مۇحامبەتوۆ جاتاقحانالار قۇرىلىسىنىڭ ساپاسىنا جانە بارىنشا سىيىمدىلىعىنا ءمان بەرىلۋى كەرەكتىگىن ەسكەرتتى.
«جاتاقحانالارعا اكت زال سەكىلدى كوبىنە بوس تۇراتىن ارتىق بولمەلەر كەرەك ەمەس دەپ ويلايمىن. ستۋدەنتتەر جينالاتىن اكت زالدار ۋنيۆەسريتەت كورپۋستارىندا دا جەتكىلىكتى ەمەس پە؟ سوندىقتان جاتاقحانادا كىشكەنتاي حولل, ءدالىز بولسا جەتەدى, قالعانىن مۇمكىندىگىنشە ستۋدەنتتەر تۇراتىن بولمە ەتۋ كەرەك. جوبانى جاساعاندا بۇل ەسكەرىلۋى ءتيىس» دەدى ارحيمەد بەگەجان ۇلى.
ءوڭىر باسشىسى سونىمەن قاتار جاتاقحانالار قۇرىلىسىن لاجىنشا قار كەتىپ, جەر قۇرعاعان سوڭ باستاي بەرۋ كەرەكتىگىن دە باسا ايتتى.
ءنازيرا جارىمبەت,
«Egemen Qazaqstan»
قوستاناي