ەلباسى نۇرسۇلتان نازارباەۆتىڭ قازاقستان جاستارىنا دەگەن قامقورلىعىنا تاۋەلسىزدىك العان كەزدەن باستاپ كۋا بولىپ كەلەمىز. بۇل قاتاردا «بولاشاق», «ديپلوممەن – اۋىلعا», «جاستار پراكتيكاسى» مەن جۇمىسپەن قامتۋعا ارنالعان وزگە دە باعدارلامالاردى, جاس وتباسىلاردى باسپانالى ەتۋدىڭ ءتۇرلى جولدارىن كوزدەيتىن وزگە دە جوبالاردى ايتساق بولادى.
ال بيىلعى جىلدى جاستار جىلى دەپ جاريالاۋى مەملەكەت باسشىسىنىڭ بولاشاقتىڭ ىرگەتاسىن قالاپ جاتقان جاستاردىڭ جاعدايىن جاقسارتۋعا باعىتتالعان ناقتى قادام دەپ بىلەمىز.
ەلباسىنىڭ قاتىسۋىمەن وتكەن جاستار جىلىنىڭ اشىلۋىن تىكەلەي ەفيردەن تاماشالاي وتىرىپ, قازاقستان جاستارىنىڭ امبيتسيالارى زور, تالپىنىسى مىقتى, ەرتەڭگى كۇنگە دەگەن سەنىمدەرى مەن ۇمىتتەرى وراسان ەكەنىن اڭعارىپ, شىن قۋاندىم. اسىرەسە ەلىمىزدە بالاماسى جوق جوبالار ۇسىنا كەلگەن جاڭا بۋىن وكىلدەرىنىڭ تالابىنا تامساندىم.
سول ۇسىنىستاردىڭ ىشىندە قازاقتىڭ ساياتشىلىق ونەرىن جاھان جۇرتىنا جاريا ەتىپ جۇرگەن ايشولپاننىڭ جاس جۇرەگىنىڭ «وتانىم» دەپ ەلجىرەگەنى ەرەكشە اسەر ەتتى. ال ونىڭ «استانادا جانە باسقا قالالاردا قازاقتىڭ سالت-ءداستۇرىن وقىپ-ۇيرەتەتىن ورتالىقتار, سونىڭ ىشىندە بۇركىتشىلەر مەكتەبى اشىلسا» دەگەن تىلەگى كوپتەن بەرى كوكەيدە جۇرگەن ويدى ءدوپ باستى.
ەگەر مۇنداي مەكتەپ قۇرىلار بولسا, ونىڭ پايداسى مول بولار ەدى. بىرىنشىدەن, بۇل قۇستار ۇستايتىن ارنايى پيتومنيك اشۋعا مۇمكىندىك بەرەدى. ويتكەنى قازىرگى ۋاقىتتا ءبىزدىڭ قۇسبەگىلەر بۇركىت, قارشىعا, لاشىن سەكىلدى اڭشى قۇستاردى دالادان اۋلاپ الۋدا. بىراق ونىڭ باسىم بولىگى قىزىل كىتاپقا ەنگەن. دەمەك الەمدىك جانۋارلار قۇقىعىن قورعاۋ ۇيىمى قازاق ساياتشىلارىن جاۋاپكەرشىلىككە تارتۋى مۇمكىن. ال ارنايى قۇس اسىرايتىن ورىن بولسا, وزىمىزدە ءوسىرىپ, باۋلۋعا جول اشىلار ەدى.
ەكىنشىدەن, مەكتەپ جانىنان جاس ناتۋراليستەر ۇيىرمەسىن اشۋعا دا بولادى. ءبىر مىسال ايتا كەتەيىن, جۋىردا عانا تاراز قالاسىنداعى جەڭىس پاركىندە «ۇشبۇلاق» جاعالاۋى پايدالانۋعا بەرىلدى. وندا جىبەرىلگەن اققۋ-قازدار قالالىقتاردىڭ كوز قۋانىشىنا اينالدى.
ۇشىنشىدەن, اتا-بابامىزدىڭ سالت-ءداستۇرىن وقىتىپ, ۇيرەتەتىن مەكتەپتەردە قازاقتىڭ اتبەگىلىك, قۇسبەگىلىك, كۇيشىلىك پەن انشىلىك سىندى قۇندى ونەرلەرىن ءبىر ارناعا توعىستىرعان سال-سەرىلىكتى دە جانداندىرۋعا مۇمكىندىك تۋار ەدى. بىلايشا ايتقاندا, بۇل سەكىلدى مەكتەپتى اشۋ – جاستار جىلىنداعى جارقىن جوبالاردىڭ ءبىرى بولارى ءسوزسىز.
جالپى, قازاقتا ساياتشى قىزدار كوپ بولعان. الايدا ونىڭ ءبىرىن بىلسەك, ءبىرىن بىلمەيمىز. وسى رەتتە اتا ونەردى الەمگە تانىتىپ جۇرگەن ايشولپان قىزىمىزعا العىسىمدى بىلدىرەمىن. ال جاستار جىلى ايشولپان سەكىلدى ارمانى اسقاق, تالابى تاۋداي جاستاردىڭ ماقساتىنا جەتۋىنە ۇلكەن مۇمكىندىك بولادى دەپ ويلايمىن.
جاپار ساتىلعانوۆ,
قۇسبەگى, ارداگەر
جامبىل وبلىسى