11-سىنىپ وقۋشىلارى ۇبت-دان سىناق تاپسىردى. ءبىلىم جانە عىلىم مينيسترلىگىنىڭ مالىمەتىنشە, 18-20 قاڭتار ارالىعىندا 35 838 تالاپكەر سىناققا قاتىسقان. ونىڭ ىشىندە 61-ءى ءبىلىمىن اعىلشىن تىلىندە سىناعان. ال شەت تىلىندە ۇزدىك تاپسىرعان تالاپكەرگە «بولاشاق» ستيپەندياسىن يەلەنۋگە مۇمكىندىك بار.
وقۋشىلار تەستىلەۋدى قازاق, ورىس جانە اعىلشىن تىلدەرىندە تاپسىرا الادى. ال بيىلدان باستاپ تالاپكەرلەر ۇبت-نى ءتورت رەت تاپسىرا الاتىن بولدى. «بۇل باستامانىڭ ماقساتى – مەكتەپ بىتىرۋشىلەردىڭ جوو-عا ءتۇسۋ مۇمكىندىگىن ارتتىرۋ», دەپ ءتۇسىندىردى جاۋاپتى ۆەدومستۆو وكىلى. مينيسترلىكتىڭ مالىمەتىنشە, اعىلشىن تىلىندە تاپسىرۋعا نيەتتىلەردىڭ قاتارى جىل سايىن كوبەيىپ كەلەدى. ماسەلەن, 2018 جىلى 25 وقۋشى بولسا, ونىڭ سانى بيىل 36-عا ارتقان.
وسى كورسەتكىشكە «حالىقارالىق باعدارلامالار ورتالىعى» اق قىزىعۋشىلىق تانىتقان كورىنەدى. سونىڭ ناتيجەسىندە اتالعان ورتالىق باسشىسى جانبولات مەلدەشوۆ تەستى اعىلشىن تىلىندە ۇزدىك تاپسىرعان تالاپكەرگە گرانت بولۋگە دايىن ەكەندىگىن جەتكىزگەن. سونىمەن قاتار بىرقاتار شەتەلدىك سەرىكتەس جوو-لاردى دا بەلگىلەپتى. بۇل شەت تىلىندە تاپسىرىپ جاتقان وقۋشىلاردى ىنتالاندىرۋ ماقساتىندا قولعا الىنعان.
ج. مەلدەشوۆتىڭ مالىمدەۋىنشە, 2019 جىلى شەتەلدىك جوو-لار ءبىزدىڭ ازاماتتارعا 40 000 گرانت بولۋگە دايىن ەكەن. بۇل – ارينە ءار تالاپكەردىڭ تەگىن ءبىلىم الۋعا مۇمكىندىگى بارىنا دالەل. «مەكتەپ تۇلەكتەرى ۇبت سەرتيفيكاتىمەن قازاقستاندىق جوو-لارعا عانا ەمەس, شەتەلدىك وقۋ ورىندارىنا دا تۇسە الادى. مىسالى, تۇركيا جوعارى وقۋ ورىندارى ءبىزدىڭ سەرتيفيكاتىمىزبەن قابىلدايدى. ول ءۇشىن اعىلشىن جانە تۇرىك تىلدەرىن ءبىلۋى كەرەك», دەيدى ول.
«بولاشاق» باعدارلاماسىن جۇزەگە اسىرۋدىڭ باستاپقى كەزەڭىندە باكالاۆر دارەجەسى بويىنشا شەتەلگە جولداما بەرىلگەن. بىراق كەيىن بۇل جويىلىپ, تەك ماگيستراتۋرا مەن دوكتورانتۋرا بويىنشا عانا شەكارادان شىعۋعا مۇمكىندىك بولدى. قازىر دە سولاي. الايدا ەندى اتالعان مەملەكەتتىك باعدارلامامەن باكالاۆردى دا الەمدەگى بەلدى وقۋ ورىندارىندا بىتىرۋگە بولادى. بىراق بۇل – ۇبت-نى شەت تىلىندە تاپسىرعان تۇلەكتەرگە عانا بەرىلگەن مۇمكىندىك. ول ءۇشىن 60-تىڭ اينالاسىنداعى ءبىلىمدى باسەكەستەردى باسىپ وزۋ كەرەك.
ايدانا شوتبايقىزى,
«Egemen Qazaqstan»