بۇگىن ىشكى ىستەر مينيسترلىگى مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋباەۆ «وحوتزووپروم» ءوب رمقك ينسپەكتورى ەرلان نۇرعاليەۆتىڭ ولىمىنە قاتىستى ءۇش كۇدىكتىنىڭ ۇستالعانى جونىندە مالىمدەمە جاسادى.
ەسكە سالساق, بيىلعى 15 قاڭتار كۇنى قاراعاندى وبلىسىنىڭ نۇرا اۋدانىندا «وحوتزووپروم» رەسپۋبليكالىق مەكەمەسىنىڭ ينسپەكتورى ەرلان نۇرعاليەۆ كيىكتەر مەن سيرەك كەزدەسەتىن جانۋارلاردى قورعاۋ رەيدى كەزىندە براكونەرلەر قولىنان اۋىر جارالانىپ, ارتىنشا قازا تاپقان بولاتىن.
كۇدىكتىلەردىڭ ارادا ءبىر اپتاداي ۋاقىت وتكەننەن كەيىن پوليتسيا قۇرىعىنا ىلىككەنى تۋرالى حابار الىسىمەن مارقۇمنىڭ استانا قالاسىندا تۇراتىن ءىنىسى نۇرلان نۇرعاليەۆكە تەلەفون ارقىلى حابارلاسىپ, ءمان-جايدى سۇراستىرعان ەدىك.
– نۇرلان بالعابەك ۇلى, اعاڭىز – «وحوتزووپروم» رەسپۋبليكالىق مەكەمەسىنىڭ ينسپەكتورى ەرلان نۇرعاليەۆتىڭ ولىمىنە قاتىسى بار دەگەن ءۇش كۇدىكتىنىڭ ۇستالعانى تۋرالى اقپارات تۋراسىندا نە ايتاسىز؟
– جالپى, بۇدان بۇرىن وسى قىلمىسقا قاتىسى بار ءتورت ادام ءوز ەركىمەن كەلىپ, قىزىلوردا وبلىسىنىڭ ءبىر اۋدانىنداعى پوليتسيا بولىمىنە بەرىلگەن بولاتىن. ال بۇگىن ۇستالدى دەگەن ءۇش كۇدىكتىنى وقيعا بولعاننان كەيىن ەكى كۇن وتكەندە قىزىلوردا قالاسىنا كىرە بەرىستە پوليتسيا قىزمەتكەرلەرى ۇستاعان. سول كەزدە ولار مىنگەن اۆتوكولىك قاربالاس ءساتتى پايدالانىپ, قاشىپ كەتكەن دەگەن دەرەك بار. سوعان قاراعاندا, سول كولىكتىڭ ىشىندە پوليتسيا قىزمەتكەرى بولعان-اۋ دەگەن كۇدىگىم بار.
– جالپى, ءوز باسىڭىز تەرگەۋ امالدارىنىڭ ادىلەتتى تۇردە وتەتىنىنە, قىلمىسقا قاتىسى بارلاردىڭ لايىقتى جازالارىن الاتىنىنا سەنەمدىسىز بە؟
– وسى وقيعانىڭ كۋاگەرى, ەرلاننىڭ جانىندا بولعان پەتر نيتسىك ءالى كۇنگە دەيىن اۋرۋحاناعا جاتقىزىلماعان. ءوزىنىڭ باسى وڭباي جارىلعان ەكەن. كەشە بارىپ, وزىمەن كەزدەستىم. ۇرەيلى كورىندى, ۇيىندە تىعىلىپ وتىرعانداي اسەر قالدىردى. الايدا, سوزىنە قاراعاندا, بۇگىنگى كۇنگە دەيىن وعان ەشكىم قىسىم جاساماپتى, قورقىتۋ-ۇركىتۋ دەگەن اتىمەن بولعان جوق دەپ وتىر...
نەگىزى, كۇدىكتىلەردىڭ ءبارى قولعا ءتۇستى عوي, ەندى تەرگەۋ امالدارىنىڭ ادىلەتتى جۇرگىزىلۋىن قاداعالايتىن بولامىز. ەرتە مە, كەش پە, ءبارى دە سورپا بەتىنە شىعادى دەپ ويلايمىن.
– قازىر الەۋمەتتىك جەلىدە قىزمەت بابىندا قازا تاپقان ەرلان نۇرعاليەۆتىڭ رۋحىنا لايىقتى قۇرمەت كورسەتۋ تۋرالى ۇسىنىستار ايتىلىپ جاتىر. مىسالى, جەلى قولدانۋشىلارى مارقۇمعا ەسكەرتكىش قويىپ, كوشە اتاۋىنا ونىڭ ەسىمىن بەرۋ كەرەك دەگەن ماسەلە كوتەردى.
– مەنىڭ ارمانىم – تۋعان اۋىلىمىز بارشىندا مەشىت سالىپ, وعان ەرلاننىڭ اتىن بەرۋ. وعان مەنىڭ جالعىز ءوزىمنىڭ شامام كەلمەيدى. كوپ بولىپ قولعا الىنسا, بۇل دەگەنىڭىز اعامنىڭ رۋحىنا كورسەتىلگەن زور قۇرمەت بولار ەدى. مەنىڭشە, ەرلىكپەن قازا تاپقان ەرلان نۇرعاليەۆتىڭ ەسىمىن وسىلايشا ەستە قالدىرعان ءجون دەپ ويلايمىن. ال ەندى, جوعارىدا ايتىلعان ۇسىنىستارعا ەسشقانداي قارسىلىعىم جوق. اعام – مەن ءۇشىن ناعىز قاھارمان!
ال ەرلان اعام قىزمەت ەتكەن «وحوتزووپروم» رەسپۋبليكالىق مەكەمەسى قولدان كەلگەن كومەكتەن ايانىپ جاتقان جوق. جالپى, وسى وقيعاعا قاتىستى ءۇن قوسىپ, ازاماتتىق كوزقاراستارىن تانىتىپ, قولداۋ ءبىلدىرىپ جاتقان بارشا قازاقستاندىقتارعا باسىمدى ءيىپ, العىس ايتقىم كەلەدى!
اڭگىمەلەسكەن
قايرات ءابىلدا,
«ەگەمەن قازاقستان»
قاراعاندى