ش.ايمانوۆ اتىنداعى «قازاقفيلم» كينوستۋدياسىندا تۇسىرىلگەن رەجيسسەر تالعات تەمەنوۆتىڭ ء«بىزدىڭ قالانىڭ كىشكەنتاي حانزاداسى» اتتى ءفيلمى 9-18 قاڭتار ارالىعىندا بانگلادەشتىڭ داككا قالاسىندا وتكەن ءحۇىى حالىقارالىق كينوفەستيۆالىندە «ەڭ ۇزدىك بالالار ءفيلمى» اتاندى.
تالعات تەمەنوۆتىڭ سوڭعى تۇسىرگەن بۇل كينوتۋىندىسى جالعىزدىقتان جاپا شەككەن ەكى مۇڭلىقتىڭ ۇلكەن قالادا جولىعىسۋىن, ولاردىڭ اراسىندا قيىندىقسىز وربىگەن كىرشىكسىز دوستىق تۋرالى باياندالادى. بالالار ءۇيىنىڭ اداسىپ كەتكەن التى جاستاعى تاربيەلەنۋشىسى بيبول مەن قارتتار ءۇيىنىڭ ارداگەرى قاسىمحان اتا كەزدەيسوق تانىسادى. بىراق بۇل كەزدەسۋ كەزدەيسوق ەمەس – جەتى جاسقا قادام باسقان بالا جەتپىستەگى قارتتان ابايدىڭ بەينەسىن كورسە, قاريا ءومىردىڭ ەڭ كىشكەنتاي وكىلىنەن تىرشىلىكتىڭ ماعىناسىن ىزدەيدى. ەكى بۋىننىڭ وكىلى ارانى جالعاپ جاتقان جىلداردىڭ ايىرماسىنا قاراماستان, ءبىرىن-ءبىرى كىرپىك قاققاننان تۇسىنەتىن جاقىن جاندارعا اينالادى. كىشكەنتاي ءبۇلدىرشىننىڭ جۇرەگىنە مەيىرىممەن جول تاپقان قاريا ەندىگى جەردە بالا ءومىرىنىڭ ءبىر بولشەگى ىسپەتتى. قارت مۋزىكانت قاسىمحانمەن ەرەسەك ادامدار سەكىلدى قارىم-قاتىناس جاساۋدى ۇيرەنە باستاعان بيبول اداممەن رۋحاني-ىزگى قاسيەتتەر ارقىلى شىنايى باقىت تابۋعا بولاتىنىن تۇسىنەدى.
فيلم وقيعاسى استانا قالاسى مەن بۋراباي ەلدى مەكەنىندە وتەدى. باس كەيىپكەرلەردىڭ ءرولىن ءانۋار تولەۋقاجى مەن قازاقستاننىڭ ەڭبەك سىڭىرگەن ءارتىسى تولەۋبەك ارالباي وينايدى.
سونداي-اق جۇلدەلى ءفيلمنىڭ ستسەناريىن جازۋعا رەجيسسەر تالعات تەمەنوۆتىڭ ءوزى دە قاتىسقان, كومپوزيتورى – تولەگەن مۇحامەتجانوۆ, باس پروديۋسەر – اسحات ىبىراەۆ.
ايگۇل احانبايقىزى,
«ەگەمەن قازاقستان»
الماتى