ىشكى ىستەر مينيسترلىگى ينسپەكتور ەرلان نۇرعاليەۆتىڭ ولىمىنە قاتىسى بار كۇدىكتىلەردىڭ اتى-ءجونى مەن فوتوسىن جاريالادى. ولارعا مەملەكەتارالىق ىزدەۋ سالىنعان.
«قاراعاندى وبلىسى پوليتسيا دەپارتامەنتى 13 قاڭتاردا قاراعاندى وبلىسى نۇرا اۋدانىندا بولعان وقيعاعا بايلانىستى سوتقا دەيىنگى تەرگەۋ جۇمىستارىن جۇرگىزىپ جاتىر. كەشەندى تەرگەۋ جۇمىستارىنان كەيىن قىلمىسقا قاتىسى بار ءۇش ادام انىقتالدى. كۇدىكتىلەرگە مەملەكەتارالىق ىزدەۋ جاريالاندى», دەلىنگەن ىشكى ىستەر مينيسترلىگىنىڭ حابارلاماسىندا.
ەستەرىڭىزدە سالا كەتەيىك, التى كۇن بۇرىن «وحوتزووپروم» ءوب» رمقك ەكى ينسپەكتورى مەن براكونەرلەر اراسىندا قاقتىعىس بولىپ, تابيعات قورعاۋشىلارى اۋىر جاراقات العان-تۇعىن. كوپ ۇزاماي ينسپەكتور ەرلان نۇرعاليەۆ قازا تاپتى.
سونداي-اق ينسپەكتور ولىمىنە كۇدىكتىلەردىڭ اتى-ءجونى جاريالاندى. ولار: ك.ۆ. اقشانوۆتىڭ, ب.م.احمەتوۆ جانە ن.م.شۇكىلدەكوۆ. وبلىستىق پوليتسيا دەپارتامەنتى كۇدىكتىلەرگە قاتىستى مالىمەت بىلەتىندەردى 102 نەمەسە 8(7212)429204, 429190, 429025, 429026 نومىرلەرىنە حابارلاسۋدى سۇرايدى.
وقيعا قوعامدا قىزۋ تالقىعا ءتۇستى. «Egemen Qazaqstan» گازەتى كوپشىلىكتىڭ نازارىن اۋدارعان قايعىلى وقيعانىڭ باستى كەيىپكەرى ەرلان نۇرعاليەۆتىڭ 2018 جىلى تۇسىرىلگەن فوتوسۋرەتىن «اپتا فوتوسى» رەتىندە جاريالادى.