وتباسىلىق كلۋب اجىراسۋدىڭ الدىن الادى

بۇل كلۋبتا وتاۋ كوتەرگەن, ءومىر جولىنا قول ۇستاسىپ قادام باسۋعا نيەتتەنگەن جاستارعا پسيحولوگ كەڭەسى, زاڭ كەڭەسى تەگىن بەرىلىپ, ونەگەلى ءومىر يەلەرىنىڭ وتباسىلىق تاجىريبەسى جايلى اڭگىمە وتكىزىلەدى.

- كلۋب جۇمىس ىستەگەلى بەرى وتباسىلىق ومىرگە قادام باسقان زامانداستارىمىزعا بەلسەندى قىزمەت كورسەتىپ وتىر. وكىنىشكە قاراي, قازىر جاستار اراسىندا اجىراسۋ كوبەيىپ تۇر. ءبىز وسى الەۋمەتتىك ماسەلەنىڭ الدىن الۋعا تىرىسامىز. كوپ جاعدايدا وتباسىلىق پسيحولوگتىڭ كەڭەسىنەن كەيىن, اراسى سۋىنا باستاعان جاس جۇبايلار قايتا تابىسىپ, قاتەلىكتەرىن تۇزەپ جاتادى. وتكەن 2018 جىلى كلۋب بەلسەندىلەرىنىڭ ارالاسۋىمەن 23 جاس جۇبايدىڭ نەكەسى بۇزىلماي, جاراسىپ كەتتى, - دەيدى وبلىستىق جاستار ساياساتى ماسەلەلەرى جونىندەگى باسقارما باسشىسىنىڭ مىندەتىن اتقارۋشى داۋرەن الدابەرگەنوۆ.

قازىر جاس وتباسىلاردى قولداۋ باعىتىندا قۇرىلعان «باقىت» كلۋبىنىڭ اياسىن كەڭەيتۋگە قادام جاسالىپ جاتىر ەكەن. باستاما بارىسىندا وتباسىلىق پسيحولوگتاردىڭ شتاتىن ارتتىرىپ, ءار اۋداننان ارنايى كەڭەس بەرۋ ورتالىعى اشىلماق. جاستاردىڭ بۇل ۇسىنىسىن وبلىس اكىمى اماندىق باتالوۆ تا قولداپ وتىر.

- جاس وتباسىلار اراسىندا اجىراسۋ سانىن ازايتۋعا كۇش سالۋىمىز كەرەك. ول ءۇشىن بيىلدان باستاپ وبلىستاعى بارلىق احاج بولىمدەرى جانىنان وتباسىلىق پسيحولوگتارعا 35 شتاتتىق بىرلىك بولەتىن بولامىز. مىقتى وتباسى – مەملەكەتتىڭ گۇلدەنۋىنىڭ باستى كەپىلى, سوندىقتان جاس وتباسىلارعا قالىپتاسۋ كەزەڭدەرىندە بارىنشا قولداۋ كورسەتىلۋى ءتيىس, - دەدى جاستارمەن كەزدەسۋدە وبلىس باسشىسى.  

قالماحانبەت مۇقامەتقالي,

«ەگەمەن قازاقستان»

الماتى وبلىسى