ورال قالاسىندا وپەراتورلاردىڭ قاتىسۋىنسىز, ەلەكتروندى كىلت ارقىلى وزىنە قاجەتتى كەز كەلگەن قۇجاتتى ءوزى راسىمدەپ الاتىنداي حالىققا قىزمەت كورسەتۋ ورتالىعى اشىلدى. زاماناۋي ۇلگىدەگى تسيفرلىق تەحنولوگيالارمەن جابدىقتالعان «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ فرونت-وفيسىندە 454 قىزمەتتى ەلەكتروندى تۇردە الۋعا بولادى.
- بۇعان دەيىن مۇنداي ورتالىقتاردىڭ قىزمەتى رەسپۋبليكالىق ماڭىزى بار قالالاردا عانا قولجەتىمدى بولاتىن. مەملەكەتتىك قىزمەت كورسەتۋ رەەسترى بويىنشا قازىرگى تاڭدا 741 مەملەكەتتىك قىزمەت ءتۇرى بار, سونىڭ 454 مەملەكەتتىك قىزمەت ءتۇرى وسى جەردە ەلەكتروندى تۇردە كورسەتىلەدى, - دەيدى «ااماتتارعا ارنالعان ۇكىمەت» مك وف PR-مەنەدجەرى جادىگەر دارمەنوۆ.
ورتالىقتىڭ اشىلۋىنا قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باتىس قازاقستان وبلىسى بويىنشا دەپارتامەنتىنىڭ باسشىسى, ادەپ جونىندەگى كەڭەس توراعاسى بولات يساقوۆ, باتىس قازاقستان وبلىسىنىڭ اقپاراتتاندىرۋ, مەملەكەتتىك كورسەتىلەتىن قىزمەتتەر جانە ارحيۆتەر باسقارماسىنىڭ باسشىسى ساكەن نۇرتازاەۆ, «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باتىس قازاقستان وبلىسى بويىنشا فيليالى ديرەكتورى مارات باسساروۆ قاتىسىپ, جاڭا باستامانىڭ قالاي جۇزەگە اسىپ جاتقانىن كوردى.
- ورتالىقتا اپتاسىنا التى كۇن بويى حالىقتىڭ تسيفرلىق ساۋاتتىلىعىن ارتتىرۋ ماقساتىندا وقىتۋ سىنىپتارى جۇمىس جاسايتىن بولادى. ول جەردە كەز كەلگەن ادام ءوز ءبىلىمىن شىڭداۋعا مۇمكىندىگى بار», - دەيدى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باتىس قازاقستان وبلىسى بويىنشا فيليالى ديرەكتورى مارات باسساروۆ.
«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ فرونت-وفيسىندە ازاماتتار ارنايى ستەند-پاۆيلونداردا ورنالاسقان قوعامدىق قول جەتكىزۋ پۋنكتتەرىنىڭ, «ConnectionPoint» ءوز-وزىنە قىزمەت كورسەتۋ سەكتورىنىڭ جانە پلانشەتتەردىڭ كومەگىمەن ەلەكتروندىق وتىنىمدەردى ءوز بەتىنشە تاپسىرا الادى. سونداي-اق, وپەراتوردىڭ كومەگىنسىز وزدەرىنە قاجەت كەز كەلگەن قۇجاتتى راسىمدەپ, تسيفرلىق ساۋاتتىلىق داعدىلارىن شىڭداي الادى.
2018 جىلى باتىس قازاقستان وبلىسىندا مەملەكەتتىك قىزمەتتى ەلەكتروندى ۇكىمەت پورتالى ارقىلى الۋشىلار قاتارى كوبەيگەن. سالا ماماندارى ءموبيلدى ازاماتتار بازاسىنا تىركەلىپ, «Connection point» سەكتورىندا وزدىگىنەن قىزمەت الۋشىلاردىڭ سانى دا وتكەن جىلمەن سالىستىرعاندا اناعۇرلىم جوعارى ەكەنىن ايتادى. مىسالى, 2018 جىلى فيليالدا 200 مىڭنان اسا باتىسقازاقستاندىق ەلەكتروندى تسيفرلىق قولتاڭبا الىپ, ءوز وزىنە قىزمەت كورسەتۋ الاڭىندا 450 مىڭنان اسا مەملەكەتتىك قىزمەت الىپتى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان