«استانا وپەرا» تەاترى ەۋروپاداعى گاسترولىن ءتامامدادى

L’Eco جانە Liguria Notizie گازەتىنىڭ بەلگىلى ءجۋرناليسى كلاۋديو المانتسي بىلاي دەپ جازعان:

- گەنۋيادا «استانا وپەرا» بالەت ارتىستەرى كلاسسيكالىق ونەردى باعالاۋشىلاردىڭ سەنىمىن تولىعىمەن اقتاپ شىقتى. كارلو فەليچە تەاترىندا «ششەلكۋنچيك» بالەتى ۇزدىك دەڭگەيدە ۇسىنىلعان بولاتىن, بۇل - ەلوردالىق ترۋپپانىڭ ناعىز جەتىستىگى بولدى. كورەرمەنگە ناعىز سيقىرعا تولى عاجايىپ كەش سىيعا تارتىلدى. كوپشىلىك قاۋىم ايگىلى ونەر مايتالمانى يۋري گريگوروۆيچتىڭ تاماشا قويىلىمىن, كەرەمەت حورەوگرافياسىنىڭ تارتىمدى قيالىن بار ىنتاسىمەن تاماشالادى. ەڭ جوعارعى  دەڭگەيدە 36 بالەت شەبەرىنەن تۇراتىن باستى پارتيا ورىنداۋشىلارى مەن كوردەبالەت ارتىستەرىنە  جانە بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆاعا جالىندى قوشەمەتىمىزدى بىلدىرەمىز. «استانا وپەرا» تەاترى تەك 2013 جىلى عانا قۇرىلعانىنا قاراماستان, از ۋاقىت ىشىندە حالىقارالىق دەڭگەيدە كوپشىلىككە بەلگىلى ءارى تانىمال تەاترلاردىڭ بىرىنە اينالدى.

يتالياندىقتار مەن يسپاندىقتار الەۋمەتتىك جەلىلەردە تولاسسىز پىكىر ءبىلدىرىپ جاتتى. مىسالعا, قازاقستاندىق ترۋپپانى ءسۇيىپ تاماشالايتىن Gabriella Cavallaro تۇراقتى تۇردە «استانا وپەرا» ارتىستەرىنىڭ ونەرى تۋرالى پىكىرلەر مەن تۇسىنىكتەر جازادى: ءمىنسىز ورىنداۋ, سيرەك كەزدەسەتىن بىرەگەي ونەر! قۇتتىقتايمىز! ءبىز 13 قاڭتاردا وتەتىن سپەكتاكلگە تاعى كەلەمىز... بارلىعى كەرەمەت بولادى دەپ ويلايمىن, استانالىق ترۋپپا - عاجاپ (- Parole sante! Una esecuzione perfetta, una arte rara, unica! Complimenti! Ci saremo il 13 ....penso sia bellissimo la compagnia di Astana sono bravissimi)!

ۆالەنسيادا (يتاليا) التىناي اسىلمۇراتوۆانىڭ قويىلىمىنداعى پ.چايكوۆسكيدىڭ «اققۋ كولى» سپەكتاكلى تۋرالى News4europe.eu, Valenciaplaza.com, Efe.com, Micuenta.levante-emv.com, Elperiodicodeaqui.com, Premsavalenciana.es اقپاراتتىق اگەنتتىكتەرىنىڭ جۋرناليستەرى جانە ت.ب. قىزىقتى پىكىرلەر جازدى.

- باس پارتيالاردىڭ ورىنداۋشىلارى ايگەرىم بەكەتاەۆا (ودەتتا – وديلليا), ولجاس تارلانوۆ (حانزادا زيگفريد) پەن سەرىك ناقىسپەكوۆ (شۋت) جۇرتشىلىقتىڭ نازارىن وزدەرىنە اۋداردى. سەرىك ناقىسپەكوۆ كەرەمەت اپلومب ءادىسىن پاش ەتتى, الايدا كورەرمەن قاۋىمدى ءارتىستىڭ جۇزىندەگى ك ۇلىمسىرەگەن جىلىلىقتى ساقتاي وتىرىپ, كوپتەگەن كۇردەلى پيرۋەت جاساۋ قابىلەتى تاڭعالدىردى. سۇڭعاق تا سىمباتتى ايگەرىم بەكەتاەۆا مەن ولجاس تارلانوۆ ءتۇرلى سەزىمدەر گامماسىن تاماشا جەتكىزدى, ءسويتىپ, قازاق بالەت مەكتەبى – تەك كلاسسيكالىق بي تەحنيكاسىن مەڭگەرۋ عانا ەمەس, سونداي-اق ءوز پارتياسىن اكتەرلىك تۇرعىدان الىپ شىعۋ شەبەرلىگى ەكەندىگى بەلگىلى بولدى. ديريجەر ارمان ورازعاليەۆ وركەسترگە كەرەمەت جەتەكشىلىك ەتتى: مۋزىكانتتاردىڭ ويناۋى وتە ادەمى بولدى, - دەيدى Efe اا ءجۋرناليسى.

پەنادەس نەۆەس ەسىمدى كورەرمەن پرەمەرادان سوڭ الەۋمەتتىك جەلىگە وسى بالەتتى كۇن سايىن كورە بەرگىسى كەلەتىندىگىن جازدى (Penades Nieves: Espectacular! La vería todos los días!).

«اققۋ كولى» سپەكتاكلىنىڭ سوڭعى بەس قويىلىمىن قازاقستاندىق ارتىستەر يتاليادا كورسەتتى. مۇندا بالەت ترۋپپاسىن اسىعا كۇتكەندىگىن ايتپاسا دا تۇسىنىكتى. بارلىق كەشكە بيلەتتەر ساتىلىمعا تۇسكەن ساتتەن-اق ساتىلىپ كەتكەن. بالەت ونەرىنىڭ جاۋھارىن تاماشالاۋعا يتالياندىقتار گەنۋياعا كورشىلەس قالالاردان كەلدى.

ارتىستەر قازاقستانعا 14 قاڭتاردا قايتىپ ورالادى, ولار شامالى شارشاعاندارىمەن, شەتەلدە ەلىمىزدى ءتيىستى دەڭگەيدە كورسەتە بىلگەندەرى ءۇشىن باقىتتى.

ەسكە سالار بولساق, ەۋروپالىق گاسترول 2018 جىلدىڭ قاراشا ايىندا ا.جۇبانوۆ پەن ل.ءحاميديدىڭ ۇلتتىق جاۋھارى – «اباي» وپەراسىن ورىنداۋمەن باستالىپ, يتاليا مەن يسپانياداعى بالەت سپەكتاكلدەرىمەن جالعاسىن تاپقان ەدى.

گاسترول «رۋحاني جاڭعىرۋ» باعدارلاماسى اياسىندا قر مادەنيەت جانە سپورت مينيسترلىگىنىڭ قولداۋىمەن ءوتتى.