بريتاندىق Vouchercloud پورتالى نوبەل لاۋرەاتتارىنىڭ سانى, ەل تۇرعىندارىنىڭ ورتاشا IQ كورسەتكىشى جانە مەكتەپ ۇلگەرىمىنىڭ كريتەريلەرىنە سايكەس الەمنىڭ ەڭ اقىلدى ەلدەرىنىڭ رەيتينگىن شىعاردى.
الەمدەگى ەڭ اقىلدى 25 مەملەكەتتىڭ تىزىمىندە جاپونيا كوش باستاپ تۇر. كۇنشىعىس ەلىنىڭ ءبىرىنشى ورىنعا يە بولۋى ءۇش كريتەري بويىنشا باعالانعان. جاپونيا مەكتەپ ۇلگەرىمى بويىنشا بەسىنشى ورىن, نوبەل سىيلىعى جانە حالقىنىڭ ورتاشا IQ دەڭگەيى بويىنشا التىنشى ورىندا.
رەيتينگتىڭ ءبىرىنشى بەستىگىنە شۆەيتساريا, قىتاي, اقش جانە نيدەرلاندى كىرەدى. رەسەي – التىنشى, بەلگيا – جەتىنشى, ۇلىبريتانيا سەگىزىنشى ورىنعا تابان تىرەگەن. اقش نوبەل سىيلىعىنىڭ لاۋرەاتتارى (368 دام) ەسەبىنەن ءتورتىنشى ورىندا تۇر. ال IQ بويىنشا 28-ورىندى السا, وقۋداعى جەتىستىكتەرىمەن 13-ورىنعا جايعاسقان.
Forbes ءجۋرناليسى دۋنكان مەددەن رەيتينگتى زەرتتەي كەلە, حالىقتىڭ IQ دەڭگەيى بويىنشا كوش باستاپ تۇرعان ازيالىق مەملەكەتتەردىڭ بولاشاعى جارقىن ەكەنىن ايتقان. سينگاپۋر نوبەل سىيلىعىنىڭ لاۋرەاتتارى بويىنشا 73-ورىندا, ال IQ مەن مەكتەپتەگى وقۋ جەتىستىكتەرىن باعالاعاندا ءبىرىنشى ورىندى يەلەنگەن.
قازاقستان نەگىزگى رەيتينگكە كىرمەگەنىمەن وقۋشىلاردىڭ جەتىستىگى بويىنشا ۇلىبريتانيا, يزرايل, شۆەيتساريا ەلدەرىن باسىپ وزىپ, توعىزىنشى ورىنعا تۇراقتاعان. رەيتينگ اۆتورلارى قازاقستاننان مۇنداي ناتيجە كۇتپەگەنىن ايتقان.
«رەسەيدىڭ كورشىسى قازاقستان الەمدەگى ەڭ اقىلدى بالالارى بار مەملەكەتتەردىڭ ىشىندە ونىنشى ورىندا تۇر. مۇمكىن كوز الدىمىزدا جاڭا ينتەللەكتۋالدى دەرجاۆا قۇرىلىپ جاتقان بولار؟», دەلىنگەن پورتالداعى اقپاراتتا.