سىرتقى ىستەر ءمينيسترى بەيبىت اتامقۇلوۆ تۇركى اكادەمياسىنىڭ پرەزيدەنتى, پروفەسسور دارحان قىدىرالىمەن كەزدەستى جانە ونىڭ بارىسىندا تاراپتار تۇركى اكادەمياسى قىزمەتىنىڭ 2018 جىلعى قورىتىندىلارىن تالقىلاپ, بولاشاقتاعى ىنتىماقتاستىقتىڭ پەرسپەكتيۆالىق باعدارلارىن بەكىتتى.
تاراپتار 2019 جىلدا وتكىزۋگە جوسپارلانعان تۇركىتانۋشىلاردىڭ دۇنيەجۇزىلىك كونگرەسىنە دايىندىق جۇمىستارىنىڭ بارىسىن تالقىعا سالدى.
سۇحبات بارىسىندا ايتىلعانداي, بارشا تۇركى الەمىنە ماڭىزى زور وقيعا بولاتىن تۇركىتانۋشىلاردىڭ دۇنيەجۇزىلىك كونگرەسى دۇنيەجۇزىلىك تۇركىتانۋدىڭ قايتا وركەندەۋىنە جانە وسى عىلىمنىڭ اعىمداعى كۇيىن, جەتىستىكتەرىن, ماسەلەلەرى مەن پەرسپەكتيۆالارىن تەرەڭ ساراپتالىپ, جاڭا كوزقاراستان وتكىزۋگە ۇلكەن ىقپال ەتۋى ءتيىس.
ب.اتامقۇلوۆ تۇركى ىنتىماقتاستىعىنىڭ دامۋى جاڭا ءبىر كەزەڭگە وتكەنىن جانە مەملەكەت باسشىسى تۇركى ينتەگراتسياسىنا وتە ماڭىزدى ءمان بەرەتىنىن اتاپ ءوتتى. «تۇركى حالىقتارىنىڭ اراسىندا باۋىرلاس قاتىناستاردى نىعايتۋ مەن تۇركىتانۋ عىلىمىن تۇركى وركەنيەتىنىڭ جەتەكشىسى رەتىندە دامىتۋ, سونداي-اق پرەزيدەنت نۇرسۇلتان نازارباەۆتىڭ « ۇلى دالانىڭ جەتى قىرى» اتتى باعدارلامالىق ماقالاسىندا بەكىتىلگەن قاعيداتتاردى جۇزەگە اسىرۋ قاجەتتىلىكتەرىن ەسكەرە كەلە, مينيسترلىك وسى ماسەلەلەرگە باسا نازار اۋدارادى جانە جوسپارلانعان ءىس-شارالاردى ۇيىمداستىرۋ مەن وتكىزۋدە جان-جاقتى قولداۋ كورسەتەدى» دەدى مينيستر.
د.قىدىرالى سىرتقى ىستەر مينيسترلىگى تاراپىنان اكادەميا قىزمەتىنە جاسالعان قولداۋ ءۇشىن ۇلكەن العىسىن ءبىلدىردى. كەزدەسۋ شەڭبەرىندە ول 2019 جىلدىڭ ورتاسىندا يۋنەسكو شتاب-پاتەرىندە (پاريج ق.) تۇركى اكادەمياسىنا مۇشە-مەملەكەتتەر عالىمدارىنىڭ قاتىسۋىمەن وتەتىن « ۇلى دالا: مادەني مۇرا مەن دۇنيەجۇزىلىك تاريحىنداعى ءرولى» اتتى ءىس-شارا جونىندە اقپارات بەردى.