جەزقازعان قالاسىندا جەرگىلىكتى اكىمدىكتىڭ قولداۋىمەن الەۋمەتتىك جوبا رەتىندە دۇنيەگە كەلگەن «الاڭىم» اتتى جاستار تەاترى بار. ءبىر قىزىعى, قۇرىلعانىنا جىل جارىم بولعان بۇل ۇجىمدا كاسىبي ارتىستەر ەمەس, جۇمىسشى جاستار, ستۋدەنتتەر جانە وقۋشىلار ونەر كورسەتەدى.
– ءبىزدىڭ ونەر وشاعى تەاتر سۇيەر جاستاردىڭ ەكىنشى شاڭىراعىنا اينالدى. 2018 جىل ۇجىم ءۇشىن وتە قارقىندى ءوتتى. ءبىز گاسترولدىك ساپارمەن استانا, قاراعاندى جانە پاۆلودار قالالارىندا بولىپ قايتتىق. كورەرمەن قاۋىم بارلىق جەردە ءبىزدى وتە جىلى قابىلدادى. الداعى ۋاقىتتا دا وسىلاي جۇمىسىمىزدى جالعاستىرىپ, جاڭا دۇنيەلەر جاساپ, كورەرمەندەرىمىزدى قۋانتا بەرۋدى جوسپارلاپ وتىرمىز, – دەيدى تەاتر باسشىسى اسەم اسانحانوۆا.
قازىرگى تاڭدا تەاتر ترۋپپاسىندا 12 مەن 29 جاس ارالىعىنداعى 78 اۋەسقوي ءارتىس بار. ولار بۋففوناد, ميۋزيكل, دراما, تراگەديا, كومەديا, فارس, فەەريا جانە باسقا دا جانرلاردى بەلسەندى تۇردە مەڭگەرۋدە.
بۇگىنگى كۇنگە دەيىن «الاڭىم» جاستار تەاترى كورەرمەن نازارىنا «ايمان-شولپان», «قۇستار فەستيۆالى», «مير مودى», «ۋسلىش مەنيا», «جارالى گۇلدەر», «جەنيتبا سۋلتانا» سىندى سپەكتاكلدەردى ۇسىنىپ ۇلگەرگەن.
قايرات ءابىلدا,
«ەگەمەن قازاقستان»
قاراعاندى