«بايدىبەك اۋدانىنا بىلتىر 1 قاڭتاردا گاز كەلدى. الايدا, وسى كۇنگە دەيىن تۇرعىندارعا گاز بەرىلمەگەن. قازىر اۋىلعا بارساق, جۇرت رەنىشىن جاسىرمايدى. «ۋادە بەرەسىڭدەر, بىراق ورىندالمايدى» دەيدى. گازبەن قامتۋ جۇمىستارىنا باسىندا 1 ملرد تەڭگە جۇمسالدى. ونىڭ قايتارىمى بولۋ كەرەك. قايتارۋ ءۇشىن گازدى بەرۋ كەرەك. گازدى ءۇيدىڭ ىرگەسىندەگى «شرپ»-عا دەيىن اپارعان. ودان تۇرعىن ۇيگە قوسىپ بەرەتىندەر ءارتۇرلى باعا قويادى. ءبىرى – 80 مىڭ, ەندى ءبىرى 100-120 مىڭ تەڭگە سۇرايدى».
تۇركىستان وبلىستىق ماسليحاتىنداعى «نۇر وتان» پارتياسىنىڭ دەپۋتاتتىق فراكتسياسى جانىنداعى «نۇرلى جەر» باعدارلاماسىن ىسكە اسىرۋعا ۇلتتىق قوردان جانە بيۋدجەتتەن بولىنەتىن قاراجاتتىڭ ماقساتتى ءارى ءتيىمدى پايدالانىلۋىن باقىلاۋ جونىندەگى كوميسسيانىڭ وتىرىسىندا دەپۋتات شارىپبەك جامالبەك وسىلاي دەيدى.
كوگىلدىر وتىنسىز وتىرعان اۋدان تۇرعىندارىنىڭ جاي-كۇيىنە الاڭداۋشىلىق بىلدىرگەن ش.جامالبەك وڭىردەگى كوممۋنالدىق قىزمەت سالاسىندا ورىن العان كەمشىلىكتەردى دە كوتەرىپ, تۇرعىندار شاعىمىن وبلىستىق تۇرعىن ءۇي-كوممۋنالدىق شارۋاشىلىق جانە جولاۋشىلار كولىگى باسقارماسىنىڭ باسشىسى مارعۇلان مارايىمعا جەتكىزدى. سونداي-اق دەپۋتات كوممۋنالدىق قىزمەت جانە ونىڭ باعاسىنا قاتىستى كوپتەگەن ماسەلە ەلباسى ايتپاسا شەشىمىن تاپپاي تۇرا بەرەتىنىن ايتىپ, حالىق يگىلىگى ءۇشىن جۇمىس ىستەۋگە كەلگەندە بىلەك سىبانۋدىڭ ورنىنا ەنجارلىق تانىتاتىن شەندىلەرگە وكپەسىن جاسىرمادى.
كوميسسيا وتىرىسىندا 2018 جىلدىڭ قورىتىندىسى بويىنشا تۇركىستان وبلىسىندا «نۇرلى جەر» باعدارلاماسىنىڭ جۇزەگە اسىرىلۋ بارىسىنا جاۋاپتى باسقارما باسشىلارىنىڭ ەسەبى تىڭدالدى. وبلىستا «نۇرلى جەر» باعدارلاماسىنىڭ «ساتىپ الۋ مۇمكىندىگىنسىز جالعا بەرىلەتىن تۇرعىن ءۇي قۇرىلىسى» باعىتى اياسىندا تۇلكىباس اۋدانىندا 7 جانە كەنتاۋ قالاسىندا 7 تۇرعىن ءۇيدىڭ قۇرىلىسى جۇرگىزىلۋدە. ال تۇركىستان قالاسىندا 12 تۇرعىن ءۇي سالىنۋدا. سونداي-اق باعدارلامانىڭ بىرقاتار باعىتى بويىنشا باستالعان جۇمىستار بەلگىلەنگەن مەرزىمىندە اياقتالعان. تۇركىستان وبلىستىق قۇرىلىس باسقارماسىنىڭ باسشىسى توقتار ۋسۋباليەۆتىڭ ايتۋىنشا, بيىل وبلىستا «7-20-25» باعدارلاماسىن ىسكە اسىرۋ ءۇشىن 7 ملرد تەڭگە قارالىپ وتىر. دەپۋتاتتار مەملەكەتتىك باعدارلاما اياسىندا ۇسىنىلعان پاتەرلەر باعاسى اۋىلدىقتار ءۇشىن ءتىپتى قىمباتقا تۇسەتىنىن ايتتى. بۇل ورايدا باسقارما باسشىسى «مەردىگەرلەر قازىر تۇرعىن ءۇيدىڭ شارشى مەترىنىڭ باعاسىن 180 مىڭ تەڭگەدەن 140 مىڭ تەڭگەگە ءتۇسىرىپ جاتىر. تاعى مۇمكىندىكتەر بولسا قاراستىرامىز» دەگەن ءۋاج ايتتى. قۇرىلىس سالاسىنداعىلاردىڭ سوزىنە قاراعاندا, الداعى ۋاقىتتا وبلىستا كوپقاباتتى تۇرعىن ۇيلەر كوپتەپ بوي كوتەرەدى. ياعني ماماندار وسىلايشا ەلدى مەكەندەردە كوممۋنالدىق پروبلەمالاردىڭ الدىن الماق.
ايتا كەتەلىك, تۇركىستان وبلىسىندا بيىل 4377 پاتەر پايدالانۋعا بەرىلەدى. وبلىستا 28 مىڭنان اسا تۇرعىن پاتەر كەزەگىندە تۇرعانىن ەسكەرسەك, بيىل ەل يگىلىگىنە تاپسىرىلاتىن 4377 پاتەردى كوپ دەۋگە دە بولماس. دەگەنمەن, قۇرىلىس سالاسىندا قارقىن باسەڭدەگەن جوق. مىسالى, وبلىستا تۇرعىن ۇيلەر قۇرىلىسىنا اعىمداعى جىلى رەسپۋبليكالىق بيۋدجەتتەن 3,5 ملرد تەڭگە, ال وبلىستىق بيۋدجەتتەن 7,3 ملرد تەڭگە قاراستىرىلىپ, 63 كوپقاباتتى ارەندالىق تۇرعىن ءۇيدىڭ قۇرىلىسى جۇرگىزىلەتىن بولادى. بيىل وسى ۇيلەردىڭ 47-ءسىن پايدالانۋعا بەرۋ جوسپارلانعان. سونداي-اق «نۇرلى جەر» باعدارلاماسى بويىنشا وتكەن جىلدىڭ باسىندا 13 اۋدان, قالا اكىمدىكتەرىنە 31 ەكىقاباتتى تۇرعىن ءۇي سالۋعا وبلىستىق بيۋدجەتتەن قارجى قاراستىرىلعان بولاتىن. بۇگىنگى تاڭدا 12 تۇرعىن ءۇيدىڭ قۇرىلىسى اياقتالعان, ال 190 پاتەرلى 19 ءۇي بيىل ءبىرىنشى جارتىجىلدىقتا پايدالانۋعا بەرىلمەك.
ال «7-20-25» باعدارلاماسى اياسىندا تۇركىستان قالاسىندا «تۇركىستان» اكك اق جانە جەكە سالۋشى ارقىلى قۇرىلىسى وتكەن جىلى باستالعان 6 كوپقاباتتى تۇرعىن ءۇيدى بيىل 3-توقساندا پايدالانۋعا بەرۋ جوسپارلانىپ وتىر. سونىمەن قاتار تۇركىستان قالاسىنىڭ وتىرار شاعىن اۋدانىندا «تۇركىستان – جاڭا قالا» تۇرعىن ءۇي كەشەندەرىندەگى اۋماعى 38 گەكتار جەر تەلىمىندە 88 كوپقاباتتى تۇرعىن ءۇي بوي كوتەرىپ, اعىمداعى جىلى ونىڭ 44-ءى, ياعني 1362 پاتەر «7-20-25» باعدارلاماسى ارقىلى بەرىلەتىن بولادى.
عالىمجان ەلشىباي,
«ەگەمەن قازاقستان»