«نۇر وتان» پارتياسى جاس ونەرتاپقىشتار اراسىندا وتكىزگەن رەسپۋبليكالىق «NURINTECH» يننوۆاتسيالىق جوبالار بايقاۋىنىڭ قورىتىندىسىن جاريالادى. وسىعان وراي Astana Hub حالىقارالىق IT-ستارتاپتار تەحنوپاركىندە «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆتىڭ قاتىسۋىمەن بايقاۋ جەڭىمپازدارىن ماراپاتتاۋ سالتاناتى ءوتتى.
اتالعان بايقاۋ ەلباسى, «نۇر وتان» پارتياسىنىڭ توراعاسى نۇرسۇلتان نازارباەۆتىڭ تىكەلەي تاپسىرماسىمەن قولعا الىنعان جوبا. بايقاۋدىڭ باستى ماقساتى – جاستاردىڭ عىلىم-بىلىمگە جانە يننوۆاتسياعا دەگەن قىزىعۋشىلىقتارىن ارتتىرىپ, ولاردىڭ ستارتاپ جوبالارىنا قولداۋ كورسەتۋ.
جاس عالىمداردى جەڭىستەرىمەن قۇتتىقتاي كەلە پارتيا توراعاسىنىڭ ءبىرىنشى ورىنباسارى ماۋلەن اشىمباەۆ شارانىڭ ماڭىزىنا توقتالدى: «جاستاردىڭ عىلىمي جۇمىستارى لايىقتى جالعاسىن تاۋىپ, ەل دامۋىنا ءوز ۇلەسىن قوساتىنىنا سەنىم بىلدىرەمىز. ءتورتىنشى ونەركاسىپتىك رەۆوليۋتسيا جاعدايىندا تسيفرلاندىرۋدىڭ, يننوۆاتسيانىڭ جانە جاڭا تەحنولوگيانىڭ ماڭىزى زور. ەلباسى وسى سالاعا ەرەكشە كوڭىل ءبولىپ, ونىڭ جان-جاقتى دامۋىنا بارلىق جاعدايدى جاساپ كەلە جاتىر», دەگەن م.اشىمباەۆ بۇل ىستە جاستاردىڭ اتقارار ءرولى زور ەكەنىن تىلگە تيەك ەتتى.
بيىل قاتارىنان ءۇشىنشى رەت ۇيىمداستىرىلىپ وتىرعان شاراعا «جاس وتان» جاستار قاناتى ۇيىتقى بولدى. ناتيجەسىندە ۇزدىكتەر قاتارىندا دەپ تانىلعان ءۇش جوبا جەڭىمپاز دەپ تانىلىپ, ءار اۆتورعا 1 ميلليون تەڭگەدەن قارجىلاي سىياقى بەرىلدى.
«الەۋمەتتىك ماڭىزدى يننوۆاتسيالار» اتالىمى بويىنشا قىزىلوردالىق نۇرسۇلتان پىرىمبەتوۆ جەڭىمپاز اتاندى. QazCar.kz دەپ اتالاتىن ونىڭ جوباسى كارشەرينگ قىزمەتىنىڭ وتاندىق ۇلگىسى.
ال د.سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىنىڭ جاس عالىمدارى تانتالدان جاسالعان وتاندىق مەديتسينالىق يمپلانتتاردىڭ ۇلگىسىن ويلاپ تاپقان. جوبا «ۇزدىك جاس عالىم» اتالىمى بويىنشا جەڭىسكە جەتتى.
«قازىر ۇلگى كلينيكاعا دەيىنگى سىناقتان وتۋدە. ەگەر سىناق ناتيجەلەرى ءساتتى بولسا, قۇرىلعىلار قازاقستاندا عانا ەمەس, رەسەي نارىعىنا دا ەنەدى», دەيدى جوبا اۆتورلارى.
بىلتىر جوبادا جەڭىسكە جەتىپ, روبوت تەحنيكاسى بويىنشا حالىقارالىق جارىستاردىڭ جەڭىمپازى اتانعان الماتىلىق ليۋبوۆ دۋدچەنكونىڭ ءتۋريزمدى دامىتۋعا باعىتتالعان «joARrney» قوسىمشاسى «جاستاردىڭ يننوۆاتسيالىق جوباسى» اتالىمى بويىنشا توپ جاردى. ءموبيلدى قوسىمشا الماتى قالاسىندا تاۋعا شىققىسى كەلگەن تۋريستەرگە تاۋلى ايماقتىڭ تولىق مودەلىن شىنايى فورماتتا كورسەتەدى.
بۇدان بولەك مۇگەدەك ارباسىن اۆتوماتتاندىرۋ, كوزى ناشار كورەتىن نەمەسە مۇلدە زاعيپ جاندارعا ارنالعان روبوتتاندىرىلعان تاياق, ءوزىن-ءوزى رەتتەيتىن جىلىتۋ كابەلى, توزعان جانە تۇزدانعان جەرلەردى قالپىنا كەلتىرۋگە ارنالعان بيومەليورانت سەكىلدى جوبالار دا جۇلدەگەرلەر قاتارىنان كورىندى.
بايقاۋعا قاتىسۋعا ەلىمىزدىڭ تۇكپىر-تۇكپىرىنەن 1000-نان استام ورەن ءوتىنىم بەرىپ, كوميسسيا مۇشەلەرى 30 جۇمىستى اقتىق سىنعا ىرىكتەپ شىعارعان. جالپى جوبالار نەگىزىنەن ەكولوگيا, روبوت تەحنيكاسى, بالامالى قۋات كوزدەرى, جاسىل ەنەرگەتيكا, ونەركاسىپ, IT, مەديتسينا, حيميا, بيولوگيا, فارماتسەۆتيكا سەكىلدى سالالار بويىنشا كەلىپ تۇسكەن.
باۋىرجان مۇقان,
«ەگەمەن قازاقستان»